Astanada 14 qyrkúiekte ótetin siriialyq kelissózderde protsess qatysýshylary kelissózderdiń qorytyndysyn jasaýy qajet. Bul týraly Túrkiia prezidenti Rejep Taiip Erdoǵan Aqordada aitty, - dep habarlaidy kaz.tengrinews.kz tilshisi.
Qazaqstan Prezidenti Túrik Respýblikasynyń basshysy Erdoǵandy Astanada qarsy aldy.
"14 qyrkúiekte ótetin Astana kelissózderi óte mańyzdy. Daiyndyq jumysy aiaqtaldy dep estidim. Munda qorytyndy jasalýy tiis. Qudai qalasa, bul qadamdarymyzdyń jemisin Astanada kóremiz. Osylaisha Jeneva protsesi jeńildetiledi", - dep málimdedi Erdoǵan.
Syrtqy ister ministri Qairat Ábdirahmanov túrik tarapy Astana protsesinde kepil retinde kelissózderdiń kelesi raýndyna qatysatynyn rastaǵanyn atap ótti.
"Túrik Respýblikasynyń syrtqy ister ministriniń orynbasary delegatsiiany basqarady. Túrik Respýblikasy aldaǵy kelissózderdiń mazmundy máseleleri boiynsha belsendi jumys istep jatyr, onyń ishinde siriialyq qarýly oppozitsiianyń osy kelissózderge qatysý máselesi bar. Aldyn ala jospar boiynsha olar kelissózderge qatysatynyn rastap otyr, alaida bul jaily málimet kelesi aptanyń basynda bolady", - dedi ministr.
Ábdirahmanov túrik tarapynyń IYU-nyń Astanadaǵy aldaǵy kezdesýiniń aiasynda Mianma men Rohinja musylman halyqtarynyń máselesin kóteretinin málimdedi.
"Túrkiianyń syrtqy ister ministrimen birge Mianmadaǵy musylman halyqtyń jaǵdaiyna qatysty máselelerge nazar aýdardyq. Ol jaqynda ǵana Mianma territoriiasynan ketken musylman bosqyndaryna baryp qaitty, sol kezdesýdegi áserin aitty", - dedi ol.
Aita keteiik, Erdoǵan Qazaqstanǵa úshkúndik saparmen keldi. Ol Nursultan Nazarbaevpen kelissózder ótkizedi, sondai-aq, Astanada Islam Yntymaqtastyǵy Uiymynyń ǵylym men tehnologiialar boiynsha sammitine qatysady.
