25-26 sáýirde Nur-Sultan qalasynda Siriia boiynsha joǵary deńgeidegi 12-shi halyqaralyq kezdesý ótedi, dep habarlaidy "Ult aqparat" SIM baspasóz qyzmetine silteme jasap.
Astana formatynda buryn ótken siriiaaralyq kelissózderge uqsas, aldaǵy kezdesýde Iran, Resei men Túrkiia, Siriianyń úkimeti men qarýly oppozitsiiasy ókilderi, sondai-aq BUU men Iordaniianyń baqylaýshylar deńgeiindegi delegatsiialar qatysady.
Kelissózderdiń kezekti raýndy Siriia baǵytynda eń ózekti máselelerdi, sonyń ishinde Idlib provintsiiasy men Siriianyń soltústik-shyǵysyndaǵy qazirgi ahýaldy, qaqtyǵysýshy taraptar arasyndaǵy senimdi odan ári nyǵaitýǵa baǵyttalǵan sharalardy, sondai-aq bosqyndar men el ishindegi qonys aýdarǵan adamdardy qaitarýǵa qolǵabys kórsetý, gýmanitarlyq jaǵdaidy jaqsartý jáne eldi qaqtyǵystan keiingi qaita qalpyna keltirý máselelerin talqylaýdy josparlap otyr. Sonymen qatar, aldyn ala kún tártibine sáikes, Siriia boiynsha konstitýtsiialyq komissiiany qurý jáne iske qosý boiynsha jumysty aiaqtaýǵa basa nazar aýdara otyryp, saiasi protsesti odan ári ilgerletý joldaryn talqylaý, sondai-aq Astana protsesine jańa baqylaýshy memleketterdiń qosylý máselesi qarastyrylady.
25 sáýirde Astana protsesiniń kepilger elderiniń ekijaqty jáne úshjaqty konsýltatsiialary, sondai-aq baiqaýshy taraptarynyń ókilderimen kezdesýleri, al jalpy otyrys 26 sáýirde ótedi.
Sonymen birge, Siriia boiynsha joǵary deńgeidegi 12-shi halyqaralyq kezdesý sheńberinde Tutqyndardy bosatý, qaza tapqandardyń denelerin tabystaý jáne iz-túzsiz joǵalǵandardy izdestirý boiynsha jumys tobynyń 8-shi otyrysyn ótkizý josparlanyp otyrǵanyn eskere otyryp, atalǵan otyrysqa qatysý úshin BUU bosqyndar isteri jónindegi Joǵarǵy komissar basqarmasynyń jáne Halyqaralyq Qyzyl Krest Komitetiniń ókilderine tiisti shaqyrýlar joldanady.
