Soltústik Qazaqstan oblysyndaǵy áigili Meńgeser tuzdy kólinde taǵy da qaiǵyly oqiǵa tirkeldi. Bul joly 63 jastaǵy áiel sýǵa túskennen keiin kenetten ózin jaisyz sezinip, kóz jumdy, dep habarlaidy ult.kz.
SQO politsiia departamentiniń málimetinshe, oqiǵa 26 shilde kúni saǵat 13:00 shamasynda bolǵan. Áiel kólge týystarymen birge demalýǵa kelgen. Sý ishinde jaǵdaiy kúrt nasharlaǵan.
Jaǵaǵa shyǵarylǵan soń oǵan meditsinalyq kómek kórsetilgenimen, dárigerler onyń ómirin saqtap qala almady.
Qazirgi ýaqytta atalǵan derek boiynsha sotqa deiingi tergep-tekserý júrgizilip jatyr.
«Oqiǵanyń barlyq mán-jaiyn anyqtaýǵa baǵyttalǵan qajetti tergeý áreketteri qolǵa alyndy. Tergeý nátijesi boiynsha tiisti protsessýaldyq sheshim qabyldanady», – dep habarlady politsiianyń baspasóz qyzmeti.
Bul – Meńgeser kólinde sońǵy ýaqytta bolǵan alǵashqy qaiǵyly jaǵdai emes. Osydan bir ai buryn dál osy jerde 77 jastaǵy er adam qaitys bolǵan. Kýágerlerdiń aitýynsha, ol sýǵa túsken kezde ózin nashar sezinip, qan qysymy kóterilgen.
Mamliýt aýdanyndaǵy Meńgeser tuzdy kóli Soltústik Qazaqstan turǵyndary arasynda ǵana emes, kórshi oblystar men Reseiden keletin demalýshylar arasynda da tanymal. Kóldiń emdik balshyǵy tirek-qimyl apparaty, teri jáne basqa da birqatar aýrýlarǵa paidaly dep esepteledi.
Alaida mamandar emdik maqsatta qoldanylatyn kól sýynda uzaq ýaqyt bolýǵa bolmaitynyn eskertedi. Mamandardyń aitýynsha, sýda 15–30 minýttan artyq jatý densaýlyqqa qaýip týdyrýy múmkin.
