Qazaqstan Syrtqy ister ministrliginiń ókili Laosta eńbek quldyǵynda ekenin málimdegen Anel Bermaǵambetovanyń úndeýine qatysty pikir bildirdi, - dep habarlaidy Tengrinews.kz agenttigi.
SIM málimetinshe, otandasymyz konsýlmen bailanysqa shyǵyp, óziniń jaǵdaiy týraly aityp bergen. Qazaqstannyń Hanoidaǵy elshiligi Laostyń Syrtqy ister ministrligine ony qutqarýǵa barynsha kómek kórsetý týraly tiisti nota joldaǵan. Laos politsiiasy bul máselemen ainalysyp jatyr, erteń Laostyń SIM jáne IIM ókilderimen kelissóz ótetini belgili boldy.
"Aita keteiik, bizdiń otandasymyzǵa qaýip tónip turǵan joq, ol diplomattarmen jáne týystarymen únemi bailanysta. Onyń aitýynsha, qujattary men telefonyna tiispegen, telefon men internet bailanysyn shektemegen, sondai-aq, kúsh qoldanbaǵan. Ol Tailandqa jáne odan ári óz erkimen barǵan. Sondai-aq, Aneldiń aitýynsha, jumys berýshiler onyń ushýyna, turýyna jáne basqa da shyǵyndaryna jumsaǵan qarajaty ótelse, jiberýge daiyn", - dedi QR SIM resmi ókili Aibek Smadiiarov.
Bul másele Vetnamdaǵy elshiliktiń erekshe baqylaýyna alynǵan. SIM jáne QR Vetnamdaǵy elshiligi Aneldiń úiine oralýyna kómektesedi.
Qazaqstan SIM azamattardan shet elde jumys isteý úshin qujattar men kelisimsharttarǵa qol qoiylǵanǵa deiin ári shet elge shyqqanǵa deiin bárin muqiiat zerdeleýdi, sondai-aq, kútpegen jaǵdai týyndamaý úshin jumys berýshilerdi tekserýdi suraidy.
Eske salaiyq, buǵan deiin Jelide Laostaǵy qazaqstandyq kómek suraǵany habarlanǵan bolatyn.
