Astanada Qazaqstanda jumys isteitin Qytai kásiporyndarynyń besinshi bos jumys oryndary jármeńkesi ótti. Oǵan 24 kompaniia men 300-ge jýyq jas qazaqstandyq qatysty, dep habarlaidy ult.kz.
Is-sharany Qazaqstandaǵy Qytai kásipkerleriniń bas qaýymdastyǵy, QHR joǵary oqý oryndary túlekteriniń qaýymdastyǵy jáne «Qytai tili kópiri» klýby birlesip uiymdastyrdy.
Qytaidyń Qazaqstandaǵy elshiliginiń saýda-ekonomikalyq máseleler jónindegi keńesshisi Van Miaonyń aitýynsha, mundai sharalar Qytai kompaniialary men jas mamandar arasyndaǵy bailanysty nyǵaityp, jergilikti kadrlardy tartýǵa jáne Qazaqstan ekonomikasyn damytýǵa yqpal etedi.
«Bos jumys oryndary jármeńkesi Qytai kompaniialary men jas mamandardyń ózara bailanys ornatýyna qolaily ári tiimdi alań ǵana emes. Sonymen qatar ol Qytai kásiporyndarynyń Qazaqstan ekonomikasyn ártaraptandyrýǵa belsendi qatysýyna, jergilikti naryqty igerýine, óndiristi oqshaýlaýdy kúsheitýine, áleýmettik mindettemelerin oryndaýyna jáne uzaq merzimdi damýyn qamtamasyz etýine múmkindik beredi», – dedi Van Miao.
Qazaqstandaǵy Qytai kásipkerleriniń bas qaýymdastyǵynyń bas hatshysy Liý Iýeniń aitýynsha, Qytai kompaniialary Qazaqstanǵa jekelegen jobalardy júzege asyrý úshin ǵana emes, uzaq merzimdi jumys istep, biznesterin damytý jáne jergilikti naryqtaǵy ornyn nyǵaitý maqsatynda keledi.
«Muny olardyń biznesti oqshaýlaýǵa baǵyttalǵan qadamdary da kórsetedi», – dep otyr Liý Iýe.
QHR joǵary oqý oryndary túlekteri qaýymdastyǵynyń tóraiymy Aigerim Nigmetjannyń aitýynsha, qaýymdastyq Qytaida bilim alǵan qazaqstandyq jastardyń jumysqa ornalasýyna qoldaý kórsetý maqsatynda qurylǵan.
«Qytaida oqyp kelgen túlekterdiń jumys tabýda qiyndyqtarǵa kezigetinin baiqadyq. Sondyqtan qaýymdastyqty quryp, Qytai ýniversitetterin támamdaǵan jáne qytai nemese aǵylshyn tilderin meńgergen mamandarǵa Qazaqstandaǵy qytailyq kompaniialardan jumys tabýǵa kómektesýdi maqsat ettik», – dedi ol.
Sondai-aq onyń aitýynsha, biyl jármeńkege qatysatyn kompaniialar sany ótken jylmen salystyrǵanda eki esege jýyq artqan. Byltyr 12 kásiporyn qatyssa, biyl olardyń sany 25-ke jetken.
«Qazir qytailyq kompaniialarǵa aýdarmashylardan góri injenerler, IT mamandary men býhgalterler kóbirek qajet. Jumys berýshiler úshin til bilý jáne tiisti sala boiynsha diplomnyń bolýy mańyzdy. Keibir kompaniialar tájiribesi joq jas mamandardy da jumysqa qabyldap, ózderi úiretýge daiyn», – dedi Aigerim Nigmetjan.
Ol Qytaida bilim alǵan qazaqstandyq túlekterdiń eki eldiń mádenieti men iskerlik qarym-qatynas erekshelikterin jaqsy túsinýi úlken artyqshylyq ekenin atap ótti. Mundai mamandar qazaqstandyq jáne qytailyq kompaniialar arasyndaǵy bailanysty nyǵaitýǵa kómektesedi.
Eýraziia ulttyq ýniversiteti Filologiia fakýlteti Qytai filologiiasy kafedrasynyń meńgerýshisi Qariphan Asyl jármeńkege 4-kýrs stýdentteri men 1–2-kýrs magistranttaryn arnaiy alyp kelgen. Onyń aitýynsha, mundai sharalar jastarǵa bolashaq jumys berýshilermen tanysyp, óz bilimderi men qabiletterin kórsetýge múmkindik beredi.
«Bul jármeńke stýdentterimizdiń bolashaqta jumysqa ornalasýyna, óz bilimin, qabileti men kásibi daǵdylaryn tanytýyna úlken múmkindik beredi. Sondyqtan biz jyl saiyn stýdentterimizdi osyndai sharalarǵa qatystyryp, olardyń eńbek naryǵyndaǵy múmkindikterin keńeitýge tyrysamyz», – dedi ol.
Kafedra meńgerýshisiniń sózinshe, Qytai filologiiasy mamandyǵyn bitirgen túlekter qytai tilin qajet etetin kompaniialar men oqý ortalyqtarynda jumys istei alady. Oqý barysynda stýdentter qytai tilin joǵary deńgeide meńgerip, kásibi ortada qoldanýǵa qajetti bilim alady.
«Qytai tiline degen suranys jyl saiyn artyp keledi. Qazaqstan men Qytai arasyndaǵy saýda, meditsina, bilim berý jáne basqa da salalardaǵy bailanystardyń damýy jańa jumys oryndarynyń ashylýyna yqpal etýde. Qytailyq kompaniialar men kásiporyndardyń Qazaqstanda kóbeiýi bizdiń stýdentter úshin de jańa múmkindikterge jol ashady», – dep atap ótti Qariphan Asyl.
Soluxe Hotel Astana qonaqúiiniń kadr bóliminiń basshysy Aitolqyn Keńesovanyń aitýynsha, bos jumys oryndary jármeńkesi jumys berýshilerge qajetti mamandardy tikelei kezdestirip, olardyń kásibi jáne jeke qabiletterin baǵalaýǵa múmkindik beredi.
«Bizge qytai tilin meńgergen mamandar qajet. Sondyqtan mundai jármeńkelerdiń paidasy zor. Úmitkerlermen betpe-bet sóilesip, olardyń til bilý deńgeiin, ózin ustaýyn, qarym-qatynas jasaý qabiletin baǵalai alamyz. Bul jumys izdeýshilerge de, jumys berýshilerge de óte yńǵaily», – dedi ol.
Onyń sózinshe, bes juldyzdy qonaqúi men onyń úsh meiramhanasynda ártúrli baǵyttaǵy mamandarǵa suranys bar. Máselen, resepshn qyzmetkerlerinen aǵylshyn tilin bilý talap etilse, basshylardyń kómekshileri men aýdarmashylaryna qytai tilin meńgerý mańyzdy.
Aitolqyn Keńesova stýdentter úshin aýysymdyq jumys kestesiniń qolaily ekenin de atap ótti. Al tazalyq jáne ydys jýý qyzmetkerlerin tabý keide qiyndyq týǵyzady. Sonymen qatar, qonaqúide kadr irikteý Qazaqstannyń eńbek zańnamasy men talaptaryna sáikes júrgiziledi.
Aita keteiik, jármeńkede energetika, qurylys, óndiris, taý-ken ónerkásibi, tehnologiia jáne aýyl sharýashylyǵy salalaryndaǵy kásiporyndar bos jumys oryndaryn usynyp, úmitkerlerge qoiylatyn talaptar men mansaptyq ósý múmkindikterin tanystyrdy.
