Qazaqstannyń syrtqy ister ministrligine 618 azamattan ótinish kelip túsken. Onyń 117-si – Qytaidyń burynǵy azamattarynan. Bul týraly búgin syrtqy ister ministrligi baspasóz qyzmetiniń jetekshisi Aibek Smadiiarov málimdedi, dep habarlaidy Sputnik Qazaqstan tilshisi.
Smadiiarovtyń aitýynsha, jyl basynan beri Qytai aýmaǵynda qos azamattyǵy úshin 22 qandasymyz ustalǵan. Qazirgi tańda onyń 15-i bosatyldy.
"Qazirgi tańda bizge beimálim bolǵan faktiler anyqtalyp jatyr. Biz olarǵa kómek kórsetemiz. Qytaidaǵy elshilik jáne basqa da konsýldyqtar bul máselemen ainalysýda", — dedi ol apta saiynǵy brifingte.
Ol Qazaqstannyń Beijińdegi elshiligi, sonymen qatar SIM quramyndaǵy konsýldyq qyzmet departamenti Qytaidyń Astanadaǵy elshiligimen tyǵyz jumys istep júrgizip jatqanyn atap ótti.
"Qazirgi tańda syrtqy ister ministrligine 618 azamattan aryz kelip tústi. Onyń 117-si – Qytaidyń burynǵy, qazirgi Qazaqstan azamattarynan. Olar Qytai azamattyǵynan shyǵýǵa kómek kórsetý týraly aryzdanyp jatyr. Qytai tarapy barlyǵyn qajetti qujatpen qamtamasyz etýde", — dedi Smadiiarov.
Sondai-aq, onyń aitýynsha, Qytai tarapy Qazaqstanǵa ótinish bildirgen.
"Qytai tarapy Qytai azamattyǵynan shyǵatyn qandastarymyzǵa mindetti túrde tolyqqandy aqparat jetkizýdi ótindi. Óitkeni qandastarymyz azamattyqtan shyǵý, qujat tapsyrý erejeleri sekildi biraz aqparattty bilmeidi eken. Bilmegendikten osyndai jaǵdaiǵa ushyrap otyr. Qytai tarapy da bul baǵytta jumys júrgizip jatyr", — dedi ol.
