Koronavirýs tabylyp, Japoniia jaǵalaýynda karantinge turyp qalǵan Diamond Princess kemesindegi tórt qazaqstandyq 19 aqpanda karantinnen shyǵady, qosymsha testten aman-esen ótse, jaqyn arada Qazaqstanǵa oralady, dedi Syrtqy ister ministri Muhtar Tileýberdi sársenbi kúni.
"Bizdiń azamattardan virýs tabylǵan joq, kemedegi synaq sony dáleldedi. Qazir 14 kúnge sozylǵan karantin merzimi aiaqtaldy. Búginnen bastap olardy lainerden shyǵara bastaidy. Jerde qosymsha testen ótedi" dedi jýrnalisterge Tileýberdi. Eger koronavirýs tabylmasa, jaqyn arada Qazaqstanǵa oralady.
Ministrdiń aitýynsha, tórt azamat Qazaqstan men Japoniia arasyndaǵy tikelei reis arqyly elge jetedi. Biraq olar jol shyǵynyn ózderi óteidi.
18 aqpanda syrtqy ister ministrligi kemede Qazaqstannyń tórt azamaty: 8 jáne 12 jastaǵy nemerelerimen eki áiel bar dep málimdegen edi.
Japoniia jaǵalaýynda turǵan Diamond Princess lainerinde 5 aqpanda bir adamnan koronavirýs tabylyp, karantinge jabylǵan. Keme ishinde 50 elden 3700 adam bolǵan. 18 aqpandaǵy derek boiynsha, krýizde 540 adam koronavirýs juqtyrǵan.
19 aqpandaǵy málimetke qaraǵanda, qazir Qytaida koronavirýs juqtyrǵandar 74 myńnan, qaza bolǵandar 2000-nan asqan. Qytai biliginiń dereginshe 12 myń adam koronavirýsten aiyqqan. Ortalyq Aziia elderinde koronavirýs juqtyrǵandar joq.
