Úndistan tarapy Astana qalasyndaǵy "Abý-Dabi Plazada" oryn alǵan tóbelestiń tekserilýine tolyqtai qanaǵattandy. Endi olar tergeýdiń qorytyndysyn kútip otyr, - dep habarlaidy "Ult aqparat" kaz.tengrinews.kz portalyna silteme jasap. Bul týraly QR SIM basshysy Qairat Ábdirahmanov málimdedi.
"Diplomatiialyq kanaldar boiynsha biz Úndistannyń Qazaqstan Respýblikasynda akkredittelgen elshiligimen tyǵyz bailanystamyz. Tergeý boiynsha sheteldik tarapqa esh shaǵym joq, qazaqstandyq bilik ókilderinen de shaǵym túsken joq. Úndistandyq tarap tergeýdiń qorytyndy nusqasyn kútip otyr jáne olar qazirgi ýaqytta osy jaǵdaidyń jan-jaqty tergelýine tolyqtai qanaǵattandy", - dedi ministr Parlament palatalarynyń birikken otyrysyndaǵy úzilis barysynda jýrnalisterdiń suraqtaryna jaýap bere otyryp.
Sondai-aq, osyǵan deiin QR bas prokýrory Jaqyp Asanov "Abý-Dabi Plaza" qurylys alańynda bolǵan tóbeleske qatysty pikir bildirgen edi. Qazir eki qylmystyq is qozǵaldy. Bireýi turmystyq janjal boiynsha, ekinshisi - jalǵan aqparat taratýǵa qatysty, - dep málimdedi ol Parlament palatalarynyń birikken otyrysynyń úzilisinde. Al sheteldik jumysshylardy elden kóshirip jiberý týraly suraqqa ol bul máseleni sot sheshetinin aitty.
Eske salaiyq, 2 qyrkúiekte qurylysy júrip jatqan "Ábý-Dabi Plaza" kesheninde 20.35-te Úndistan azamattary men jergilikti jumysshylar men kúzetshilerdiń arasynda kishigirim kelispeýshilik bolǵan edi. QR Ishki ister ministrliginiń Memlekettik til jáne aqparat departamentiniń direktory Almas Sádýbaevtyń habaryna qaraǵanda, qaqtyǵys kúzetshiniń Úndistan azamatyn mas kúide nysannan shyǵarýǵa qarsy bolǵandyǵynan shyqqan. Keiin ol otandastaryn shaqyryp, kúzetshini uryp-soqqan, jergilikti jumysshylar oǵan jaqtasqan, saldarynan tóbeles bolǵan, oǵan shamamen 30 adam qatysqan. Oqiǵa ornyna Úndistannyń Qazaqstandaǵy elshisi, jergilikti bilik pen kompaniia ókilderi keldi.
