Foto: Aqorda
Qazaqstan Respýblikasy Prezidentiniń teleradiokesheni men Qytai Mediakorporatsiiasy (CMG) halyqaralyq «Silk Way Star» jobasyn iske asyrý týraly kelisimge qol qoidy, dep habarlaidy Ult.kz.
Qujat Qytai Halyq Respýblikasy Tóraǵasynyń Qazaqstan Respýblikasyna jasaǵan sapary aiasynda qabyldandy. Qol qoiý rásimi eki el basshylary Qasym-Jomart Toqaev pen Si Tszinpinniń qatysýymen ótti.
Kelisimge Prezident teleradiokesheniniń direktory Raýshan Qajybaeva men Qytai Mediakorporatsiiasynyń basshysy Shen Haisiýn qol qoidy.
«Silk Way Star» – Ortalyq Aziia, Kavkaz jáne Qytai elderiniń oryndaýshylary qatysatyn alǵashqy birlesken mýzykalyq joba. Joba aiasynda konkýrs, shoýlar men gala-kontsert uiymdastyrylady. Ártúrli tilderdegi ánderdiń oryndalýy jáne mádenietter arasyndaǵy jarqyn mýzykalyq yntymaqtastyq shyǵarmashylyqtyń erekshe dialogyn qalyptastyrady. Aimaq elderiniń kórermenderi bul jańa shoýdyń kórinisterin Silk Way jáne CGTN telearnalarynan tamashalai alady.
«Búgin qol qoiylǵan kelisim bizdiń mediakompaniialar arasyndaǵy yntymaqtastyqtyń jańa betin ashady. Alǵash ret Qazaqstan men Qytaidyń eń iri mediakompaniialary álemdik deńgeidegi jobada birlesip jumys isteidi», – dedi Prezident teleradiokesheniniń direktory Raýshan Qajybaeva.
«Silk Way Star jobasynyń aýqymy Prezident teleradiokesheni men Qytai Mediakorporatsiiasynyń strategiialyq seriktestik deńgeiine sai keledi. Bul birlesken óndiris – eki kompaniia úshin de erekshe tájiribe», – dep atap ótti CMG basshysy Shen Haisiýn.
Sonymen qatar, Prezident teleradiokesheni men Qytai Mediakorporatsiiasy media salasyndaǵy birlesken jobalardy júzege asyrý týraly kelisimge qol qoidy.
Aita keteiik, 2024–2025 jyldary Prezident teleradiokesheni men CMG birqatar tabysty jobalardy iske asyrdy: «Astana-Pekin» telekópiri, «ShYU – Kópjaqty dialog arqyly kúsh biriktirý» telekonferentsiiasy jáne «SCOConnect» arnaiy shyǵarylymdary. Sondai-aq, Qazaqstan men Qytaidyń derekti filmderi turaqty túrde ózara almasyp, kórsetilýde.
