«Reketir» filmi arqyly kópshilikke tanylǵan marqum akter Murat Bisembinniń qyzy áleýmettik jelide ákesin saǵynyshpen eske alyp, onyń qazasynan keiingi aýyr kúnderi týraly syr shertti, dep habarlaidy ult.kz.
Akterdiń qyzy ákesinen aiyrylǵannan keiin qalypty ómirge oralý ońai bolmaǵanyn jasyrmady. Aitýynsha, oqyrmandary odan qaiǵyny qalai jeńgenin, ómirden qaita qýanysh tabýǵa qalai kúsh jinaǵanyn jii suraidy. Alaida bul saýaldarǵa jaýap berý ózine de qiynǵa soqqan. Ol osy ýaqytqa deiin jan dúniesindegi kúizelisti kópshilikke kórsetpeýge tyrysqan. Áleýmettik jelide kóbine ómiriniń jarqyn sátterin bóliskenimen, ákesine degen saǵynyshy áli de basylmaǵan.
«Ómirimde mundai jaǵdai bolady dep eshqashan oilamadym. Densaýlyǵyna erekshe kóńil bóletin, bilimdi de aqyldy adamnyń ómirden osynshalyqty erte ketetini úsh uiyqtasam da túsime kirmegen edi», – dep jazdy ol.
Marqumnyń qyzy ákesiniń ómiriniń sońǵy kúnderin de eske aldy. Sol kezde otbasy onyń saýyǵyp ketetinine sońyna deiin senip, jaqsy jańalyq kútýmen bolǵan.
«Ákem kóz aldymyzda birtindep sónip bara jatty. Muny men tek qazir ǵana túsinip otyrmyn. Óitkeni sol kezde bárimiz onyń jazylyp ketetinine sendik. Sol kúndi kúttik, úmitimizdi úzbedik», – deidi akterdiń qyzy.
Onyń sózinshe, ákesiniń qazasynan keiin arada ýaqyt ótse de, estelikterge qaita oralýǵa júregi daýalamaidy. Áli kúnge deiin onyń beinejazbalaryn kórip, daýysyn tyńdai almaidy. Tipti ákesiniń óz qolymen salǵan sýretterine qaraýdyń ózi aýyr tiedi. Jazbasynda ol ákesiniń nemeresiniń dúniege kelgenin kórýin qatty qalaǵanyn da jetkizdi. Sábidiń ómirge kelýi akterge aýrýmen kúresýge qosymsha kúsh berer dep úmittengen.
«Men ákemniń qyzymyzdyń dúniege kelgenin kórgenin qatty qaladym. Bul onyń ómir súrýge degen qulshynysyn arttyryp, saýyǵyp ketýine sebep bolsa eken dep armandadym. Biraq ómir basqasha sheshti», – dep jazdy ol.
Áserli jazba ákesiniń týǵan kúnine orai jariialanǵan. Qyzynyń aitýynsha, Murat Bisembin tiri bolǵanda 54 jasqa tolar edi.
Sóz sońynda ol ákesiniń endi aýyrsyný men azaptan arylǵanyna úmit bildirip, kópshilikti jaqyndarynyń qadirin bilýge jáne densaýlyqtaryna kóńil bólýge shaqyrdy.
Murat Bisembin kim?
Murat Bisembin – qazaqstandyq kinoakter, kópshilikke “Reketir” filmi arqyly tanylǵan óner iesi. Ol 1972 jyly 11 qazanda Qyzylorda qalasynda dúniege kelgen. Alǵashynda akterlik mamandyqty emes, tehnikalyq salany tańdaǵan. Politehnikalyq institýtty aýyl sharýashylyǵynyń injener-mehanigi mamandyǵy boiynsha támamdaǵan. Keiin ónerge bet buryp, Almatydaǵy óner akademiiasynda bilim alǵan. Onyń kinodaǵy alǵashqy jumystarynyń biri – “Kajdyi vzoidet na Golgofý” telehikaiasy. Alaida akterge keńinen tanymal bolýǵa 2007 jyly jaryq kórgen rejisser Aqan Sataevtyń “Reketir” filmi jol ashty. Bul týyndyda ol Rýslan esimdi qylmys áleminiń ókilin somdady. Keiin “Tomiris”, “Skaz o rozovom zaitse”, “Brat ili brak”, “Ryvok” jáne “Kto vy, gospodin Ka?” filmderine tústi. Sonymen qatar “13 klinicheskaia” telehikaiasyna qatysyp, túrli janrdaǵy týyndylarda óner kórsetti. Akterdiń jubaiy, eki uly jáne bir qyzy bar. 2024 jyldyń kúzinde oǵan uiqy beziniń qaterli isigi diagnozy qoiylǵany belgili boldy. Aýyr dertke bailanysty ol birqatar shyǵarmashylyq jobalaryn toqtatýǵa májbúr boldy. 2025 jyldyń jeltoqsanynda qyzy Diana Býlatova ákesiniń insýlt alyp, aýrýhanaǵa túskenin habarlady. Murat Bisembin 2026 jyly 8 qańtarda 53 jasynda ómirden ótti.
