«Kóshim» arnaýly áleýmettik qyzmet kórsetý ortalyǵy ótken ǵasyrdyń orta tusynan jumys istep keledi. Mekemede erekshe kútimdegi balalar tárbielenip, em-dom sharalary jasalady. Osy jumystar úshin memleket tarapynan barlyq jaǵdai jasalǵan. Jańa jyl qarsańynda «Nur Otan» partiiasy Batys Qazaqstan oblystyq filialynyń ókilderi osy arnaýly mekemege arnaiy baryp, balalarǵa demeýshilerdiń qoldaýymen daiyndalǵan syilyqtardy tabys etti.
Bul arnaýly mekemede 59, onyń 29-y júrmeitin bala em-dom qabyldap, tárbielenýde. Mekemedegi tárbielenýshilerge 184 dáriger men oqytýshy jáne áleýmettik qyzmetker jumys isteidi. Arnaýly ortalyqta qosymsha úiirmeler men sporttyq zaldar qajetti jabdyqtarmen tolyq qamtylǵan. Altynshy synyp oqýshysy Daniiar Meńdiǵaziev án aitýdy unatady. Túrli baiqaýlarǵa da qatysyp, júldeli oryndarǵa ie bolǵan.
- Men án aitqandy jaqsy kóremin. Maǵan án aitqan unaidy. Án aityp júrgenime alty jyl boldy. Astana qalasynda, ózimizdiń Oral qalasyndaǵy sahnalarda án aittym. Mektep bitirgennen keiin oqýymdy jalǵastyryp, ánshi bolǵym keledi, - deidi óte zerek bala Daniiar.
Ortalyqta balalardy emdep-tárbieleýge barlyq jaǵdai jasalǵan.
- Mekememiz negizinen 80 balaǵa arnalǵan, qazirgi tańda 59 bala tárbielenýde. Balalardyń demalysyn tiimdi uiymdastyrý maqsatynda balalarmen muǵalim-defektologtar, tárbieleýshiler, logoped, psiholog jáne dene shynyqtyrý mamandary jumys isteidi. Balalarǵa árbir meiramda merekelik sharalar uiymdastyrlady. Alty mezgil qunarly tamaq beriledi. Qajetti jaǵdaida balalardy oblystyq aýrýhanaǵa aparamyz. Demeýshiler ortalyqqa jii kelip turady. Jaz mezgilinde balalardy demalys saiabaqtaryna, sondai-aq Oral qalasyndaǵy oiyn-saýyq ortalyqtaryna demeýshilerdiń qoldaýymen jii alyp baramyz. Ata-analar qamqorlyǵynan tys qalǵan balalar bolǵandyqtan olarǵa keregi bul alaqan jylýlyǵy. Olardyń aqyl-esi kem bolǵanmen, adamnyń kóńil-kúiin, betindegi jylýlyqty birden sezip, bilip turady, - dedi áleýmettik qyzmet jónindegi maman Ainur Saparova.
Mekemege «Nur Otan» partiiasy Batys Qazaqstan oblystyq filialynyń arnaiy kelip, balalardy Jańa jyl merekesimen quttyqtady. Ortalyqtyń jái-kúiimen tanysyp, syilyqtar tabys etti.
- Qazirgi tańda 20 partiialyq joba iske asyrylýda, sonyń biri «Kedergisiz keleshek» jobasy. Osy joba aiasynda bizder múmkindigi shekteýli jandarǵa, sonyń ishinde balalarǵa kómek kórsetiledi. Búgin osy mereke qarsańynda arnaiy mekemege balalarǵa bir erekshe kóńil-kúi syilaý úshin kelip otyrmyz, - dedi «Nur Otan» partiiasy Batys Qazaqstan oblystyq filialy tóraǵasynyń orynbasary Gúlnaz Quljanova.
HASENOV BERIK
