Italiianyń Sitsiliia aralyndaǵy Messina aimaqtyq mýzeiinen Qaita órleý dáýiriniń kórnekti sýretshisi Antonello da Messinanyń tórt týyndysy urlandy. Qylmyskerler mýzeidiń birneshe deńgeili qaýipsizdik júiesin ainalyp ótip, asa qundy óner týyndylaryn alyp ketken, dep habarlaidy ult.kz.
Mýzei direktory Mariza Merkýrionyń aitýynsha, urlyq senbi kúni keshke jasalǵan. Qaskóiler dabyl júiesi men ózge de qorǵaý quraldaryn ainalyp ótip, kórme zaldaryna kirgen.
Urlanǵan jádigerlerdiń qatarynda 1473 jylǵa tiesili «Áýlie Grigorii poliptihiniń» aǵashtan jasalǵan bes taqtasynyń úsheýi bar. Budan bólek, Mariiam ana men Hristos beinelengen ekijaqty ikona da qoldy bolǵan. Bul týyndy arnaiy qorǵalǵan brondy sórede saqtalǵan.
Mýzei basshysy bolǵan jaǵdaiǵa bailanysty alańdaýshylyq bildirdi.
«Biz eseńgirep otyrmyz. Bul – mýzei, qala, qoǵam jáne óner álemi úshin úlken shyǵyn», – dedi Mariza Merkýrio. Onyń sózin Corriere della Sera basylymy jariialady.
Mýzei direktorynyń aitýynsha, urlanǵan jádigerler Messinanyń eń mańyzdy ári tanymal óner týyndylarynyń qataryna jatady.
Qazir oqiǵaǵa qatysty tergeý júrip jatyr. Quqyq qorǵaý organdary qylmysqa qatysy bar adamdardy anyqtap, urlanǵan týyndylardy tabýǵa áreket jasap jatyr.
