Kezdesý barysynda Qazaqstan men Qytai arasyndaǵy uzaqmerzimdi, jan-jaqty strategiialyq seriktestiktiń qazirgi ahýaly men perspektivalary, sondai-aq halyqaralyq jáne aimaqtyq uiymdar aiasyndaǵy yntymaqtastyq máseleleri talqylandy.
Memleket basshysy 30 jyl ishindegi strategiialyq seriktestiktiń deńgeiine joǵary baǵa berip, Qazaqstan men Qytaidyń ózara ekijaqty keshendi bailanystaryn nyǵaita berýge beiildi ekenin aitty.
Memleket basshysy QHR Tóraǵasy Si Tszinpinniń aldaǵy kúzde elimizge josparlanǵan memlekettik sapary ekijaqty qatynastardy damytýǵa tyń serpin beredi dep úmittenetinin jetkizdi.
"Biyl - óte mańyzdy jyl. Qazaqstan men Qytai arasyndaǵy diplomatiialyq qatynastardyń ornaǵanyna 30 jyl toldy. Qytaida kommýnistik partiianyń HH sezin ótkizý josparlanǵan. Aldaǵy joǵary deńgeidegi kelissózder bizdiń strategiialyq seriktestigimizdiń jylnamasyna erekshe oqiǵa retinde jazylady", - dedi Prezident.
Sonymen qatar kezdesýde Qasym-Jomart Toqaev qytailyq áriptesine júrekjardy sálemin joldady jáne QHR-dyń tóraǵalyǵymen ótetin joǵary deńgeidegi "BRIKS pliýs" onlain-dialogyna qatysýǵa shaqyrǵany úshin rizashylyǵyn bildirdi. Onlain-dialog jańa dáýirde damý úshin jahandyq seriktestik ornatý taqyrybyna arnalǵan.
Qasym-Jomart Toqaev QHR Tóraǵasynyń jahandyq qaýipsizdik jáne damý salasyndaǵy bastamasyna qoldaý bildiretinin aitty. Onyń tolyqqandy júzege asyrylýy álemdik deńgeidegi qaýipsizdik pen senimge jetpei turǵan olqylyqtardyń ornyn toltyrýǵa múmkindik beredi, sondai-aq BUU-nyń 2030 jylǵa deiingi ornyqty damý salasyndaǵy maqsattaryn júzege asyrýǵa yqpal etedi.
Van I Qasym-Jomart Toqaevqa Si Tszinpinniń sálemi men elimizdegi jalpyulttyq referendýmnyń tabysty ótýine bailanysty quttyqtaýyn jetkizdi.
"Referendým nátijeleri memleketti jan-jaqty jańǵyrtý úshin Sizdiń basshylyǵyńyzben qabyldanyp jatqan sharalardy el azamattarynyń barynsha qoldaitynyn kórsetedi. Munyń jańa Qazaqstandy qurý úshin zor máni bar, sondai-aq eldiń keleshek damýynyń berik negizin qalyptastyrady", - dedi Qytai Memlekettik keńesiniń múshesi.
Qytai ministri eki el kóshbasshylarynyń dana basshylyǵynyń arqasynda QHR men Qazaqstannyń ekijaqty qarym-qatynastary úlken ómirlik kúshke ie bolatynyn atap ótti.
"Tóraǵa Si Tszinpin Sizben aradaǵy jeke dostyqty jáne ózara senimdi joǵary baǵalaidy. Jańa Qazaqstan qurý jónindegi bastamańyz Sizdiń danalyǵyńyz ben batyldyǵyńyzdy kórsetedi. Biz Sizdiń bastamalaryńyzdyń sátti júzege asyrylýyn tolyqqandy qoldaimyz", - dedi Van I.
Kezdesý barysynda Qasym-Jomart Toqaev pen Van I aimaqtyq jáne jahandyq kún tártibiniń ózekti máseleleri jóninde pikir almasty. Olar halyqaralyq arenadaǵy, sonyń ishinde Birikken Ulttar Uiymy, Shanhai yntymaqtastyq uiymy jáne Aziiadaǵy ózara is-qimyl jáne senim sharalary jónindegi keńes, Islam yntymaqtastyǵy uiymy aiasyndaǵy yqpaldastyqty jalǵastyra berýge nietti ekenin aitty.
