Dúisenbide QHR Tóraǵasy Si Tszinpin Shanhai yntymaqtastyq uiymyna (ShYU) múshe memleketterdiń Syrtqy ister ministrleri keńesine (SIMK) qatysý úshin Beijińge kelgen sheteldik delegatsiia basshylarymen kezdesti, dep habarlaidy QazAqparat Qytaidaǵy menshikti tilshisi.
Kezdesýge Qazaqstannyń Syrtqy ister ministri Qairat Ábdirahmanov, birqatar elderdiń syrtqy saiasat vedomstvolarynyń basshylary: Qyrǵyzstannan Erlan Abdyldaev, Ózbekstannan Abdýlaziz Kamilov, Tájikstannan Sirodjidin Aslov, Reseiden Sergei Lavrov, Úndistannan Sýshma Svaradj, Pákistannan Havadj Mýhammad Asif, ShYU Bas hatshysy Rashid Alimov jáne ShYU Óńirlik terrorǵa qarsy qurylymynyń (ÓTQQ) direktory Evgenii Sysoev qatysty.
Basqosýda Si Tszinpin Shanhai yntymaqtastyq uiymynyń 17 jyl ishinde damýdyń erekshe jolynan ótip, aimaqta yqpaldy keshendi uiymǵa ainalǵanyn atap ótti. Qazirgi ýaqytta ShYU aiasynda saiasi, ekonomikalyq jáne gýmanitarlyq, sondai-aq qaýipsizdik, syrtqy bailanystar jáne institýtty qurý salalarynda yntymaqtastyq turaqty júrgizilip keledi.
Ol Qytai tarapy ShYU-ny damytýdy eldiń syrtqy saiasatynyń basym baǵyty retinde qaraitynyna mán berdi.
Qytai tarapy uiymǵa múshe elderdiń barlyǵymen saiasi salada ózara qoldaý kórsetýge, óńirde qaýipsizdik pen turaqtylyqty qamtamasyz etýge, úilestirý deńgeiin kóterýge, «Bir beldeý, bir jol» asynda yntymaqtastyqty tereńdetýge, óńirlik ekonomikalyq yntymaqtastyq tetigin qurýǵa jáne gýmanitarlyq almasýdy keńeitýge ázir.
Eske sala ketsek, Syrtqy ister ministri Qairat Ábdirahmanov Beijińge resmi saparmen keldi, sondai-aq ol ShYU SIMK-ge qatysady. Búgin ministr Beijińniń «Chaoian» ortalyq saiabaǵynda ornalasqan Abai eskertkishine gúl shoqtaryn qoidy jáne «Baldyrǵan» balalarǵa arnalǵan damý ortalyǵynyń saltanatty ashylýyna qatysty.
