Búgin Qazaqstan Syrtqy ister ministri Muhtar Tileýberdi Resei Federatsiiasynyń tóraǵalyǵymen ótken Shanhai yntymaqtastyq uiymyna (ShYU) múshe memleketterdiń Syrtqy ister ministrleri keńesiniń kezekti otyrysyna qatysty. Bul is-shara ShYU elderi SIM basshylarynyń COVID-19 pandemiiasy bastalǵannan keiingi alǵashqy kezdesýi boldy, dep habarlaidy "Ult aqparat".
Is-sharanyń negizgi maqsaty – ShYU-ǵa múshe Memleketter basshylary keńesi otyrysynyń mazmundyq bóligin daiyndaý. Atap aitqanda, ShYU Sammitiniń kún tártibi men birqatar qorytyndy qujattarynyń jobalary qaraldy jáne jalpy kelisildi.
«ShYU elderiniń syrtqy saiasi vedomstvolarynyń basshylary halyqaralyq jáne óńirlik kún tártibindegi eń ózekti máseleler boiynsha syndarly pikir almasyp, ShYU-ǵa múshe memleketterdiń jańa koronavirýs infektsiianyń pandemiiasy jaǵdaiyndaǵy yntymaqtastyǵyn talqylady.
Ministrler qazirgi zamanǵy memleketaralyq qatynastar júiesiniń yqpaldy qatysýshylarynyń biri bolyp tabylatyn jáne aimaqtaǵy qaýipsizdik pen turaqtylyqty saqtaýǵa aitarlyqtai úles qosatyn Uiymynyń róli men ornyn odan ári arttyrýdy kelisti.
ShYU-ǵa múshe memleketterdiń dialog boiynsha baiqaýshylar jáne áriptestermen ózara tiimdi yntymaqtastyǵyn damytýdyń, sondai-aq ShYU-nyń halyqaralyq jáne óńirlik uiymdarmen ózara is-qimylyn jolǵa qoiýdyń mańyzdylyǵy atap ótildi», - delingen QR Syrtqy ister ministrliginiń aqparatynda.
Shanhai yntymaqtastyq uiymy 2001 jyly quryldy. Uiym músheleri - Qazaqstan, Úndistan, Qytai, Qyrǵyzstan, Pákistan, Resei, Tájikstan jáne Ózbekstan. ShYU baqylaýshylary: Aýǵanstan, Belarýs, Iran jáne Mońǵoliia. ShYU dialogy boiynsha seriktester: Armeniia, Ázerbaijan, Kambodja, Nepal, Túrkiia jáne Shri-Lanka.
