«Astana Opera» balet trýppasynyń kórkemdik jetekshisi, Reseidiń Halyq ártisi Altynai Asylmuratovanyń qoiylymyndaǵy A.Adannyń ataqty «Korsar» baletinde mańyzdy debiýt oryn almaq. 7 shilde kúni teatrdyń Úlken zaly sahnasynda ailaker Isaak Lankedemniń partiiasynda jas daryndy ártis Janserik Ahmetov alǵash ret óner kórsetedi.
Ákki saýdager Isaak Lankedem – teńiz qaraqshylarynyń ómiri jaily jarqyn ári qyzyqty balettiń negizgi keiipkerleriniń biri. Osynaý partiiany oryndaý úshin solistte shyńdalǵan tehnikalyq daǵdylarmen qatar, aitarlyqtai akterlik sheberlik te bolýy qajet.
Qarapaiym emes beineni jetkizýdi Janserik Ahmetov óziniń basty mindeti dep biledi. Jas daryndy ártis ról interpretatsiiasyna jańa reńk pen erekshelikterdi qosa otyryp, mizanstsenalardy ázirleý boiynsha daiyndyq zalynda bar yntamen jumys jasaýda. Oryndaýshy úshin osynaý qyzyqqa toly oqiǵany bi tilimen órnektep, kórermenge keiipkerdiń barlyq sezimin jetkizý asa mańyzdy. Sebebi sahna tórinde oryn alyp jatqan is-áreket onyń keiipkeriniń tóńireginde órbidi.
- «Korsar» spektaklinde kez-kelgen jerden paida izdeitin saýdagerdiń rólin daiyndap jatyrmyn. Osyndai iri partiiany oryndaý – men úshin úlken mártebe. Senip tapsyrǵany úshin «Astana Opera» balet trýppasynyń kórkemdik jetekshisi Altynai Asylmuratovaǵa alǵysymdy bildiremin. Jas ártisterdiń barynsha ashylyp, ózderiniń jan-jaqty qyryn kórsetý múmkindiginiń baryna qýanyshtymyn. Maǵan senimmen artylǵan úmitti aqtaý asa mańyzdy. Bul beine boiynsha jumys jasaý – baǵa jetpes tájiribe, ósip, órkendeý, ózińniń kásibi sheberligińdi shyńdaý múmkindigi, - dep atap ótti Janserik Ahmetov.
Elordanyń 20 jyldyǵyn merekeleý kúnderi A.Adannyń «Korsar» baleti «Astana Opera» Úlken zalynyń sahnasynda eki ret kórsetiledi. 6 shilde kúni Isaak Lankedem rólinde kóptegen halyqaralyq baiqaýlardyń Gran-pri iegeri Baqtiiar Adamjan óner kórsetedi.
6 shildede sulý Medoranyń partiiasyn Qazaqstannyń eńbek sińirgen qairatkeri Áigerim Beketaeva, 7 shildede – Ánel Rústemova oryndaidy. Konrad – Arman Orazov, Oljas Tarlanov. Birbanto – Oljas Mahanbetáliev, Ildar Shakirzianov. Seid-pasha – Rahmetolla Naýanov, Janádil Beisembiev. Giýlnara – Qazaqstannyń eńbek sińirgen qairatkeri Mádina Basbaeva, Shuǵyla Ádephan. Qul Ali – Erkin Rahmatollaev, Qazaqstannyń eńbek sińirgen qairatkeri Taiyr Ǵataýov.
Qoiýshy horeograf – «Astana Opera» balet trýppasynyń kórkemdik jetekshisi, Reseidiń Halyq ártisi Altynai Asylmuratova, qoiýshy horeograftyń assistentteri – Reseidiń eńbek sińirgen ártisi Konstantin Zaklinskii, Elena Sherstneva. Qoiýshy stsenograf – Etsio Fridjerio, kostiýmder boiynsha sýretshi – «Oskar» syilyǵynyń laýreaty Franka Skýarchapino, proektsiialar boiynsha dizainer – Serdjio Metalli, jaryq boiynsha sýretshi – Iakopo Pantani. «Astana Opera» simfoniialyq orkestri qoiýshy dirijer Arman Orazǵalievtyń jetekshiligimen óner kórsetedi.
Spektaklderdiń bastalýy saǵat 18.00-de.
