Shymkent ákiminiń birinshi orynbasary Shyńǵys Muqan qalada bilim salasyndaǵy sybailas jemqorlyqqa tosqaýyl qoiý jumystary jaiynda aityp berdi, dep habarlaidy QazAqparat.
«Bilim salasyna toqtalaiyn. Sebebi bilim salasynda sybailas jemqorlyqtyń bolýy jalpy bolashaǵymyzǵa balta shabý dep esepteimin. Bilim – ol kirshiksiz taza, bolashaǵymyzdy jasaidy. Sondyqtan bilim salasynda sybailas jemqorlyqtyń bolýynyń ózi qisynsyz . Onymen qalai kúresemiz? Qazir Shymkent qalasynda 800-ge tarta bilim berý uiymy bar. Árqaisysynyń óziniń basshylyǵy bar, olarǵa memleket qarjysy bólinedi. Bul turǵyda sybailas jemqorlyq táýekeli kóp. Ásirese, muǵalimderdi, tehnikalyq ári ákimshilik qyzmetkerlerin mektepke taǵaiyndaǵanda kórinis beredi eken. Osy másele Shymkentte qalai sheshilip jatyr? Shymkent qalasynyń ákimi bul máselege jiti kóńil bólip otyr. Qazir arnaiy portalǵa (www.hr-process.kz/1) tapsyrys berilgen. Kez kelgen bilim berý uiymy, iaǵni mektep bir muǵalimdi alatyn bolsa, onyń tiisti talaptary eskerilgen», - dedi Sh. Muqan Feisbýktegi Antikor.live alańynda ótken brifingte.
Osy oraida ol ball kórsetkishi joǵary muǵalimder jumysqa qabyldanatynyn aitty.
«Direktorǵa «meni jumysqa al» dep aqsha usynsa da, ony jumysqa ala almaidy. Sebebi kez kelgen bos oryn sol portalǵa ornalastyrylady. Portalǵa qyzmetke turam deitin úmitkerler ótinishterin engizedi, túrli kriteriiler boiynsha ball berilgen. Portal, aqparattyq tehnologiia 75 paiyzǵa deiin qai muǵalimniń qandai áleýeti bar ekenin anyqtap beredi. Tek qana 25 paiyzyn mektepte qurylǵan komissiia sheshedi. Sondyqtan kórsetkishteri joǵary muǵalimdi mektep direktory alýǵa mindetti bolyp qalady. Sonymen qatar, mekteptiń direktorlaryn taǵaiyndaý Qazaqstan Respýblikasynyń zańnamasymen rettelgen, jeti deńgeiden turady», - dedi Shymkent qalasy ákiminiń birinshi orynbasary.
«Degenmen qanshalyqty myqty júie jasalǵanymen, qanshalyqty barlyǵyn aqparattyq baǵdarlamalarǵa engizgenimen, sol basshy óziniń ar-uiatynyń aldynda adal bolmasa, báribir zańnama talaptary buzylýy múmkin. Bizdiń maqsatymyz – sybailas jemqorlyq táýekelderin tsifrlandyrý arqyly ǵana emes, sonymen qatar basshylarmen tikelei jumys isteý aiasynda aldyn alý. Qazir kez kelgen bilim salasyndaǵy basshy durys túsinýi tiis. Eger adal ári ádil bilim úshin jumys isteitin bolsa, biz myqty Qazaqstannyń bolashaǵyn qalyptastyra almaqpyz. Balalarymyz damyǵan elde tursyn desek, bilimge adal qyzmet etýimiz kerek. Sondyqtan bul jerde adamnyń ar-uiaty, sana máselesi de úlken mánge ie», - dedi Shyńǵys Muqan.
