Memleket basshysy Qasym-Jomart Toqaev Almaty jurtshylyǵymen kezdesýinde halqymyz úshin mańyzy joǵary qasietter men qundylyqtarǵa toqtaldy, - dep habarlaidy "Ult aqparat" Aqorda baspasóz qyzmetine silteme jasap.
«Birinshi mańyzdy másele. Biz eńbekqor bolýymyz qajet. Qoǵamymyzda eńbek adamy birinshi orynda turýǵa tiis. Shyn máninde, barlyq jetistiktiń bastaýy – adal eńbek jáne iskerlik. Tabysqa jetýdiń jalǵyz joly – óz kásibiniń sheberi bolý jáne erinbei eńbek etý. Túrli qarjy piramidasyna, qumar oiyndarǵa áýes adamdar aqshanyń ońai jolmen kelmeitinin túsinýi kerek. Mańdai terimen tabys tapqan adam ony maqsatsyz shashyp, ysyrap qylmaidy. Únemshil, qanaǵatshyl ári uqypty bolady.
Men akademik Asqar Jumadildaev aitqan paiymmen tolyq kelisemin. Halqymyz osyndai kúrdeli zamanda eń aldymen, álemge pragmatikalyq kózben qaraýy kerek. Bos áńgimelerdi toqtatý qajet. Mysaly, Shyńǵys han qai rýdan shyqty degen talas-tartysty qoiý kerek dep oilaimyn.
Qazirgi tańda ziialy qaýymnyń keibiri shetinen tarihshy, shyńǵystanýshylar bolyp ketti. Munyń qoǵamymyzǵa paida ákelerine kúmánim bar.
Jastarymyzdyń sanasy sergek, eti tiri, shiraq bolýy qajet. Kórshi memleketterdegi jas azamattar shetelge baryp, kásiporyndar, dúkender ashyp, jaqsy ómir súrý úshin jańa daǵdylardy igerip jatyr. Olar, shyn máninde, básekege qabiletti eńbekqor adamdar.
Qazirgi jaǵdaida men bir jerde ómir súremin, balalarymmen ómir boiy birge turamyn degen uǵym ábden eskirgen. Sondyqtan, qurmetti aǵaiyn, bárimiz ozyq bolaiyq! Sonda ǵana jastarymyzdyń kózi ashyq, kókiregi oiaý, oilary ushqyr bolady, kóptegen syn-qaterge tótep bere alady. Óz jaǵdaiyn ózderi jasap, jaqsy ómir súre alady» - dedi Prezident.
Memleket basshysynyń aitýynsha, eńbegimiz ónimdi ári berekeli bolýy úshin biz bilimpaz bolýymyz kerek.
«Biz ózgelerden bilim, ǵylym, qarym-qabilet arqyly ǵana oza alamyz. Ol úshin jastarymyz jasampazdyqqa jáne jańashyldyqqa umtylýy qajet. Álem elderiniń jaqsy qasietterin úirenip, ony halyqqa dáripteý kerek. Sondai-aq, tek úirenetin emes, ózgege úiretetin ultqa ainalatyn kez keldi» - dedi ol.
Sondai-aq, Qasym-Jomart Toqaev elimizde jaýapkershilik ideologiiasy ornyǵýǵa tiis ekenin aitty.
«Úshinshi. Biz jastarǵa ozyq bilimmen qatar ónegeli tárbie berýge tiispiz. Urpaqtyń boiyna adamgershilik qasietti sińire almasaq, bilimniń paidasynan ziiany kóp bolýy múmkin. Qansha jerden bilimdi bolsa da, jaqsylyqqa umtylmaǵan adamnan esh qaiyr joq.
Qoǵamda durys qundylyqtar ornyqpasa, jemqorlyq, masyldyq, ysyrapshyldyq siiaqty áleýmettik keselder tamyr jaiady. Qatigezdik, nemqurailyq, jalqaýlyq – ulttyń bolmysyna teris áser etetin jaǵymsyz ádetter. Qazirgi almaǵaiyp zamanda biz sabyrly, baiypty bolýymyz qajet. Túrli arandatýǵa ilespei, ár nársege ustamdylyqpen qaraýymyz kerek. Barlyǵyn bir sátte ózgertemin deýge bolmaidy. Halyqqa qajetti sharalardy birtindep júzege asyryp jatyrmyz.
Elimizde jaýapkershilik ideologiiasy ornyǵýǵa tiis. Oilanbai jasalǵan bir qadam, ańdamai aitylǵan bir aýyz sóz, ashýmen istelgen bir áreket búkil elge qaýip tóndirýi múmkin. Sondyqtan, árbir adam el aldyndaǵy jaýapkershiligin tereń sezinýge tiis. Biz árdaiym ózara baýyrmaldyq pen tilektestikti, meiirimdilikti dáripteýimiz kerek. Azamattardyń bir-birine qamqorlyǵy elge degen janashyrlyqqa ulasady.
Tórtinshi. Biz otanshyl jáne memleketshil bolýymyz kerek. Shyn máninde, týǵan jerińdi súiýden asqan baqyt joq. Júregi Otanym, Elim, Jerim dep soqqan adam eshteńeden qaimyqpaidy.
Bizdiń Qazaqstannan basqa Otanymyz joq. Eń basty bailyǵymyz – týǵan elimiz. Sondyqtan memleket múddesi qashanda barlyǵynan biik turady» - dedi Prezident.
