Shymkentte qoǵamdyq kólikterdi baqylaýǵa arnalǵan mobildi qosymsha iske qosylady. Endigi jerde qala halqy men qonaqtary ózine qajetti qoǵamdyq kólikterdiń qai jerde kele jatqanyn, qansha ýaqytta jetetinin qolyndaǵy smartfonnyń kómegimen bile alady. Bul týraly qala ákiminiń orynbasary Qairat Nurtaidyń qoǵamdyq kólik kompaniialarynyń basshylarymen kezdesýinde málim boldy, dep habarlaidy "Ult aqparat" QazAqparat agenttigine silteme jasap.
Jiynda qalalyq jolaýshylar kóligi jáne avtomobil joldary bóliminiń basshysy Qýatjan Jumataev qoǵamdyq kólik máselesi boiynsha atqarylǵan jumystar jóninde baiandama jasady. Onyń aitýynsha, birqatar kompaniialarda qoǵamdyq kólikterdi baqylap otyratyn GPS ornatylmaǵan. Atalǵan máselege jaýapty kompaniia basshylary bir apta ishinde olqylyqtardyń ornyn toltyrýǵa ýáde berdi.
«GPS barlyq avtobýstarda ornatylýy kerek. Biz ol arqyly árbir qoǵamdyq kólikti baqylap otyramyz. Eger qurylǵyńyz istemei qalsa jumysyńyz kórinbei qalady. Sondyqtan bul máseleni erterek túzetý kerek. Buzylǵandaryn jóndep, jańasyn satyp alýǵa bir apta ýaqyt beriledi», - dedi Qairat Nurtai.
Sondai-aq, jiyn barysynda qoǵamdyq kólikterdegi bilet bermeý, júrgizýshilerdiń jol erejesin buzýy, aialdamaǵa toqtamaý, kondýktorlardyń aiqailaýy sekildi máseleler de talqylandy. Kólik kompaniialary tarapynan jiberilgen kemshilikter sóz boldy. Kezdesý sońynda qala ákiminiń orynbasary kompaniia basshylaryna birqatar mindetter júktep, naqty tapsyrmalar berdi.
