Foto: videodan alynǵan kadr
Sybailas jemqorlyqqa qarsy is-qimyl agenttigi preventsiia qyzmetiniń basshysy Saian Ahmetjanov shymkenttik sheneýniktiń ákimdik jiynynda tutqyndalýy týraly pikir bildirdi, - «Ult aqparat» Kazinformǵa silteme jasap.
«Shymkent ákimi qatysyp otyrǵan jiyn ústinen taraǵan kórinisti qazaqstandyqtar qyzý talqylap jatyr. Sybailas jemqorlyqqa qarsy qyzmet spektaklge ainalyp barady dep oilamaisyz ba?» dep surady jýrnalist.
Agenttik ókili bul oqiǵa vedomstvoda qaralǵanyn aitty.
«Atalǵan oqiǵany qaradyq. Sybailas jemqorlyqqa qarsy qyzmet búkil jerde ashyq jumys istep keledi. Tergeý organdary jiberetin shaqyrýdyń kez kelgeni maquldaý arqyly iske asady. Osy turǵydan alsaq, aýmaqtyq organymyz bul jaǵdaidy jergilikti atqarýshy organnyń basshysy – ákimmen birlesip maquldanǵan. Bul qala ákiminiń bastamasy bolsa kerek», - dedi Saian Ahmetjanov.
Eske salsaq, áleýmettik jelide Shymkent qalasynyń ákimi jiyn ústinde qolastyndaǵy sheneýnikti sybailas jemqorlyqqa qarsy qyzmet ókilderine ustatyp jibergeni týraly video taraǵan bolatyn.
- Jemqorlyqtyń saldarynan memleket tarapynan bastaý alǵan kóptegen jobalardyń halyqqa paidasy tiisti deńgeide timei kelgenin bárimiz bilemiz. Otanymyzdyń qaýipsizdigi men halyqtyń ál-aýqaty sybailas jemqorlyqpen kúres jónindegi júieli sharalarǵa tikelei bailanysty ekenin atap kórsetken Memleketimizdiń basshysy Qasym-Jomart Kemelulynyń tapsyrmasyna sai bul saladaǵy jumystar barynsha kúsheitilip, óz jemisin berip jatyr.
- Ár memlekettik qyzmetshi óz qyzmetinde eń aldymen halyqtyń igiligin oilap, soǵan súiene sheshim qabyldaýy kerek. Sondyqtan alǵashqy kúnnen bastap ákimdik jáne ákimdikke qarasty mekeme qyzmetkerlerine osy týraly aityp kele jatyrmyn. Jiberilgen kemshilik pen jasalǵan qateniń eń óreskeli, esh keshirilmesi - halyq amanatyna qol suǵý. Mundai áreketterge kóz jumyp qarai almaitynymdy bes ai boiy barsha áriptesterime úzdiksiz eskertýmen kelemin. Bul máseleni quqyq qorǵaý organdarynyń ókilderimen de birneshe márte talqylaǵan bolatynbyz.
- Sybailas jemqorlyqqa qarsy is-qimyl agentiginiń tarapynan qalalyq basqarmalardyń birinde basshy laýazymdaǵy azamattyń is-áreketteri kúdik týdyrǵany anyqtalǵan. Osyǵan orai, ákimdiktiń búgingi apparattyq májilisi ústinde atalǵan azamatty tergeý jumystary júrgiziletin ýaqyt aralyǵyna qamaqqa alý múmkindigi berildi. Kópshiliktiń kóz aldynda oryn alǵan bul jaǵdai sol jiynǵa qatysqan ákimdiktiń basshylyq quramymen qatar barsha qyzmetkerlerge oi salar dep bilemin. Ár nárseniń suraýy baryn, birinshi kezekte suraý salar adam bar ekenin áriptesterimniń umytpaǵany jón. Mundaidan arashalap, qorǵap qalar eshkim bolmaidy. Tek qana eńbekti adal atqaryp, mindetimizdi abyroily oryndap, el alǵysyna bólenýimiz qajet.
Basqarma bastyǵy seismikalyq qaýipsizdikke bólingen 120 mln teńgeni jymqyrdy dep aiyptalyp otyr.
