Shymkent qalasynda keibir sheneýnikter «7-20-25» turǵyn úi baǵdarlamasy boiynsha baspana alǵan. Bul týraly Qurylys jáne turǵyn úi kommýnaldyq sharýashylyq isteri komitetiniń tóraǵasy Almas Ydyrysov málim etti, dep habarlaidy QazAqparat.
Ortalyq kommýnikatsiialar qyzmeti alańynda ótken baspasóz máslihatynda «7-20-25» turǵyn úi baǵdarlamasyna ótinim qabyldaý bastalǵan kezde, júiedegi aqaýdan qazaqstandyqtar ótinimdi ýaqytyly bere almady. Al osy sátte keibir shymkenttik sheneýnikterdiń ótinimi kedergisiz qabyldandy. Bul qalai bolǵany?» - degen saýal qoidy tilshi.
Atalǵan saýalǵa Qurylys jáne turǵyn úi kommýnaldyq sharýashylyq isteri komitetiniń tóraǵasy Almas Ydyrysov jaýap berdi.
«Búginde atalǵan faktige qatysty Indýstriia jáne infraqurylymdyq damý ministrligi Shymkent qalasynyń ákimdigine saýal joldady. Jaǵdaidy túsindirýin talap etemiz. Osy tusta aitarymyz, memlekettik turǵyn úi baǵdarlamasy onyń bekitilgen erejesine sai iske asýy tiis. Shymkent qalasy ákimdiginiń belgili bir memlekettik qyzmetshiler arasynda turǵyn úi konkýrsyn ótkizip, «7-20-25» aiasynda baspana bergeni baǵdarlama erejesin buzyp otyr degen sóz», - dedi ol.
Onyń aitýynsha, qazirgi ýaqytta atalǵan aimaq ákimdigine sheshimdi qaita qaraý usynyldy.
«Sonymen qatar, turǵyn úi baǵdarlamasy erejesin buzǵany úshin, kinálilerdi jaýapqa tartý kerektigi aityldy. Atalǵan másele bizdiń baqylaýymyzda. Tekserý nátijesinde ministrlik tarapynan qabyldanǵan sheshim týraly qosymsha habarlanatyn bolady», - deidi ol.
