Shymkenttik dárigerler ókpesi isten shyqqan 52 jastaǵy naýqasty aman alyp qaldy. Jaǵdaiy aýyr bolǵandyqtan, dárigerler ony birden jansaqtaý bólimine jatqyzǵan, dep habarlaidy "Ult aqparat".
Qalalyq densaýlyq saqtaý basqarmasynyń málimetinshe, Isagil Tasim 4 sáýir kúni óte aýyr hálde aýrýhanaǵa túsken. Ony dárigerler «Atameken» meditsinalyq ortalyǵynan Shymkent qalalyq juqpaly aýrýlar ortalyǵyna jedel járdem qyzmetimen aýystyrǵan. Ókpesiniń 80 paiyzy zaqymdalǵan 52 jastaǵy azamattan koronavirýs infektsiiasy anyqtalǵan. Buǵan qosa, ol ózdiginen demala almaǵandyqtan, apparatqa qosylǵan. Naýqasta tynys jetispeýshiliginiń 3-dárejesi, aiqyn intoksikatsiialyq sindromy, trombotsittiń tómen bolýy syndy asqynýlar bolǵan. Naýqasqa dárigerler tolyq em kórsetip, antikoagýliantty jáne antibakterildyq terapiia boiynsha kómek kórsetken.
«On kúnnen asa jansaqtaý bóliminde em alǵan naýqasty dárigerler jaǵdaiy jaqsarǵan soń bólimshege aýystyrdy. Keiin ózdiginen tynys ala bastady. Tynys alý jiiligi de jaqsarǵan. Aldaǵy bir-eki kúnde aýrýhanadan shyǵarýdy josparlap otyr», - delingen habarlamada.
