Shymkentte saýda ortalyǵynyń qyzmetkerleri mamandyqtaryn aýystyryp, akýsher bolýǵa májbúr boldy. Keshe atalǵan saýda ortalyǵynda saǵat ekiler shamasynda 27 jastaǵy kelinshek bosandy. Al mekeme qyzmetkerleri alǵashqy kómek kórsetip, sharanany aman-esen týdyryp aldy, - dep habarlaidy Tengrinews.kz tilshisi otyrar.kz saityna silteme jasap.
Ortalyq qyzmetkerleriniń aitýynsha, basynda olar abdyrap qalǵan, biraq keiin birigip kómek kórsetýge tyrysqan. Bosanǵan áieldiń ózi eseńgirep qaldy. Náreste saýda ortalyǵy qyzmetkerleriniń kómeginiń arqasynda dúniege keldi. Kelinshek bosanýǵa jaǵdai jasalǵan kiiný bólmesinde bosandy.
Kiim aýystyratyn bólmede dúniege kelgen náreste tez arada qalalyq perinataldyq ortalyqqa jetkizilgen. Salmaǵy 3 keli, boiy 54 sm. Aq halattylardyń aitýynsha, ana men balanyń qazirgi jaǵdaiy jaqsy.
Baqytjan Pozilov, Shymkent qalalyq densaýlyq saqtaý basqarmasynyń basshysy:
"Jaǵdaiy jaqsy. Tez arada reanimatsiia brigadasy jiberildi. Artynsha kiýezi bar arnaiy brigada jiberildi. Ana men balaǵa alǵashqy kómek kórsetilip, qalalyq perinataldyq ortalyqqa jetkizildi. Óitkeni ol eń jaqyn ornalasqan aýrýhana. Qazir jaǵdailary jaqsy. Qalalyq bosaný úiine tasymaldaý boiynsha suraqtar sheshilip jatyr".
Eske salaiyq, bul saýda oiyn-saýyq ortalyǵynyń qyzmetkerleri bosandyrǵan ekinshi jaǵdai. 2019 jyldyń aqpanynda qyzmetkerler 23 jastaǵy kelinshektiń bosanýyna kómektesken.
