شىمكەنتتە ساۋدا ورتالىعىنىڭ قىزمەتكەرلەرٸ ماماندىقتارىن اۋىستىرىپ, اكۋشەر بولۋعا مەجبٷر بولدى. كەشە اتالعان ساۋدا ورتالىعىندا ساعات ەكٸلەر شاماسىندا 27 جاستاعى كەلٸنشەك بوساندى. ال مەكەمە قىزمەتكەرلەرٸ العاشقى كٶمەك كٶرسەتٸپ, شارانانى امان-ەسەن تۋدىرىپ الدى, - دەپ حابارلايدى Tengrinews.kz تٸلشٸسٸ otyrar.kz سايتىنا سٸلتەمە جاساپ.
ورتالىق قىزمەتكەرلەرٸنٸڭ ايتۋىنشا, باسىندا ولار ابدىراپ قالعان, بٸراق كەيٸن بٸرٸگٸپ كٶمەك كٶرسەتۋگە تىرىسقان. بوسانعان ەيەلدٸڭ ٶزٸ ەسەڭگٸرەپ قالدى. نەرەستە ساۋدا ورتالىعى قىزمەتكەرلەرٸنٸڭ كٶمەگٸنٸڭ ارقاسىندا دٷنيەگە كەلدٸ. كەلٸنشەك بوسانۋعا جاعداي جاسالعان كيٸنۋ بٶلمەسٸندە بوساندى.
كيٸم اۋىستىراتىن بٶلمەدە دٷنيەگە كەلگەن نەرەستە تەز ارادا قالالىق پەريناتالدىق ورتالىققا جەتكٸزٸلگەن. سالماعى 3 كەلٸ, بويى 54 سم. اق حالاتتىلاردىڭ ايتۋىنشا, انا مەن بالانىڭ قازٸرگٸ جاعدايى جاقسى.
باقىتجان پوزيلوۆ, شىمكەنت قالالىق دەنساۋلىق ساقتاۋ باسقارماسىنىڭ باسشىسى:
"جاعدايى جاقسى. تەز ارادا رەانيماتسييا بريگاداسى جٸبەرٸلدٸ. ارتىنشا كيۋەزٸ بار ارنايى بريگادا جٸبەرٸلدٸ. انا مەن بالاعا العاشقى كٶمەك كٶرسەتٸلٸپ, قالالىق پەريناتالدىق ورتالىققا جەتكٸزٸلدٸ. ٶيتكەنٸ ول ەڭ جاقىن ورنالاسقان اۋرۋحانا. قازٸر جاعدايلارى جاقسى. قالالىق بوسانۋ ٷيٸنە تاسىمالداۋ بويىنشا سۇراقتار شەشٸلٸپ جاتىر".
ەسكە سالايىق, بۇل ساۋدا ويىن-ساۋىق ورتالىعىنىڭ قىزمەتكەرلەرٸ بوساندىرعان ەكٸنشٸ جاعداي. 2019 جىلدىڭ اقپانىندا قىزمەتكەرلەر 23 جاستاعى كەلٸنشەكتٸڭ بوسانۋىنا كٶمەكتەسكەن.
