Atyshýly milliarderler Aleksandr Mashkeevich, Alidjan Ibragimov jáne Patoh Shodievke tiesili Eurasian Resources Group Shymkentti jylýmen qamtamasyz etetin jalǵyz kásiporyn «Energoortalyq-3» AQ-nyń 94 paiyz aktsiiasyn satyp aldy. Bul týraly atalǵan kompaniianyń resmi saity habarlady. ERG aktsiialardy «Iýjenergoprom» JShS-inen satyp alǵan. Ekiarada qandai kelisimniń bolǵandyǵy ázirge ashyq aitylmady.
«3 Energoortalyq» AQ-y 2000 jyly qurylǵan. Ol jylý jáne elektr energiiasyn óndirýmen ainalysady. Onyń quramyndaǵy elektr stantsiiasy 1981 jyldan beri jumys isteidi. Munda jylyna orta eseppen 700 million kVT/saǵat elektr qýaty óndiriledi. Kásiporynda 600-den astam adam jumys isteidi.
Sońǵy jyldary «3-Energoortalyqtyń» biýdjet jáne ózine taýar jetkizip berýshi kompaniialar aldyndaǵy qaryzy qordalanyp qalǵan bolatyn. Ásirese, jylý ortalyǵynyń «QazTransGaz» aldyndaǵy qaryzy kóbeiip ketken edi. Jylý óndirýge ketetin shyǵynnyń artýynan Shymkentte jylý tarifi jii kóteriledi. Sońǵy ret ol byltyr qańtarda 129 teńge 40 tiyn bolyp bekitilgen bolatyn. ERG kásiporyndaǵy qarjy turaqtylyǵyn qamtamasyz etip, qaryzdardan tezirek qutylýdyń josparyn jasap qoiǵan kórinedi. Sondai-aq, kásiporynda elektr energiiasyn tiimdi jolmen óndirý úshin qural jabdyqtardy jańartýǵa investitsiia tartpaq.
Aita keteiik, Eurasian Resources Group paidaly qazbalardy óndirýmen ainalysatyn álemdegi iri kompaniialardyń biri. Tórt qurlyqta qyzmet etetin kompaniianyń 80 myńnan astam jumysshysy bar. ERG-niń Qazaqstanda tústi metall, elektr energiiasyn, kómir óndiretin jáne kólik salasynda qyzmet etetin birneshe kompaniiasy bar.
Ataqty milliarderler búkil Shymkenttiń halqy qarap otyrǵan, basy daýdan arylmaǵan jylý ortalyǵynyń jumysyn jónge qoia alady ma? Kútip kórelik.
Baqytjan Ábdirash, Shymkent
"Jas Alash" gazeti
