Shymkent qalasyndaǵy juqpaly aýrýlar aýrýhanasynyń tórt qyzmetkeri naýqastardan COVID-19 indetin juqtyrǵan. Bul týraly qalalyq densaýlyq saqtaý basqarmasynyń basshylyǵy málimdedi, dep habarlaidy "Ult aqparat".
Qalalyq densaýlyq saqtaý basqarmasy basshysynyń orynbasary Aigúl Bekbaýovanyń aitýynsha, qaýipti indetti reanimatsiialyq bólimniń eki medbikesi men bir tazalyq qyzmetkeri juqtyrǵany anyqtalǵan. Kúni keshe olardan alynǵan synamalar qaýipti indetke shaldyqqanyn rastaǵan.
«Qaýipti infektsiia 32 jáne 45 jastaǵy eki medbike men 22 jastaǵy bir sanitar qyzmetkerinen anyqtalǵan. Bul meditsina qyzmetkerleriniń qazirgi densaýlyq jaǵdailary qanaǵattanarlyq, shaǵymdary joq. Olar bizde koronavirýstan qaitys bolǵan túrkistandyq úsh naýqasty emdeý kezinde jumys istegen»,- dedi Aigúl Bekbaýova.
Búgin qalada taǵy úsh adamnan COVID-19 infektsiiasynyń juqtyrǵany anyqtalǵan. Naýqastar 34 jastaǵy juqpaly aýrýlar aýrýhanasynyń sanitary men 54 jáne 13 jastaǵy qala turǵyndary.
«Indet juqtyrǵan qala turǵyndary aýrýhanaǵa jedel respiratorlyq infektsiiasy diagnozymen túsken. Úilerinde em qabyldaǵanymen aýrýlary asqynǵan. Koronavirýs juqtyrǵandarmen bailanysta bolmaǵan. Qazirgi tańda bul naýqastardyń qaida, kimnen juqtyrǵany boiynsha epidemiologiialyq taldaý júrgizilýde. Olarmen bailanysta bolǵan 31 adam karantinge jatqyzyldy», - dedi Aigúl Bekbaýova.
