Shymkent qalasyndaǵy №1 oblystyq perinataldyq ortalyqtyń janyndaǵy jeke dárihanada bolǵan jarylys saldarynan qaza bolǵandar sany artty, dep habarlaidy "Ult aqparat" DSM baspasóz qyzmetine silteme jasap.
"Ókinishke orai, 1979 jyly týǵan kúzetshi B., 1980 jyly týǵan jumysshy Sh. jáne 18 kún buryn týǵan 1 sábi qaiǵyly oqiǵanyń qurbany boldy. Taǵy 8 adam zardap shekti, olardyń barlyǵy qalanyń meditsinalyq mekemelerine jatqyzyldy.
Oqiǵa kezinde perinataldyq ortalyqta 189 naýqas pen 65 qyzmetker bolǵan. Olardyń barlyǵy Shymkenttiń basqa meditsinalyq uiymdaryna kóshirildi.
Psihologtar tobynyń jumysy uiymdastyryldy. Budan basqa Túrkistan oblysy boiynsha júkti jáne jańa týǵan nárestelerdi baǵyttaýdy uiymdastyrý men ózgertý boiynsha jumystar shuǵyl túrde júzege asyrylyp jatyr.
Meditsinalyq qyzmetkerler brigadalary aýylda perinataldyq kómek kórsetý úshin aýdandyq aýrýhanalarǵa jiberiledi, sebebi, №1 OPO 3-shi deńgeidegi fýnktsiialardy oryndap, oblystyń 7 aýdanynan júkti áielder men jańa týǵan nárestelerdi emdeýge jatqyzýdy júzege asyrdy" - delingen habarlamada.
Zardap shekkenderge A.Syzǵanov atyndaǵy UǴHO dárigerleri keńes berip jatyr.
"Túrkistan oblysynyń Densaýlyq saqtaý basqarmasyn ýaqytsha óńirlendirý týraly tiisti buiryq daiyndalyp, oblystyq klinikalyq aýrýhanada óńir ákiminiń orynbasary bastaǵan jumys shtaby quryldy.
Jaǵdai QR Densaýlyq saqtaý ministrliginiń baqylaýynda tur, oqiǵa ornyna QR DSM Ana men bala densaýlyǵyn qorǵaý departamentiniń basshysy bardy.
Qaza tapqandardyń otbasylaryna kóńil aitamyz. Zardap shekkenderge kómek kórsetý jáne osy qaiǵyly oqiǵany tergeý úshin vedomstvo barlyq qajetti sharalardy qabyldaidy" - deidi ministrlik ókilderi.
Aita keteiik, búgin Shymkent qalasynda aýrýhanany qajetti preparattarmen qamtamasyz etetin dárihanada jarylys boldy.
"Mejbolnichnaia 138 apteka" JShS-ine tiesili ǵimarattyń jalpy aýdany – 360 sharshy metr. Tilsiz jaý 55 sharshy metrge sharpyǵan. Jarylystyń saldarynan ǵimarattyń 130 sharshy metri qirady.
Jaqyn turǵan bes qabattyń úidegi páterdiń terezeleri men balkony buzyldy. Sondai-aq, 7 kólikke zaqym keldi. Oblystyq perinataldyq ortalyqta bolǵan barlyq adam basqa jerlerge kóshirildi. Olardyń ishinde júkti áielder, balalar jáne meditsina qyzmetkerleri bar.
