Shymkentte tótenshe jaǵdai rejimin qamtamasyz etý jónindegi óńirlik shtabtyń kezekti otyrysy ótti. Basqosýda qala ákimi Murat Áitenov qaýipsizdik sharalaryn kúsheitý men strategiialyq nysandardyń daiyndyǵyn arttyrýdy, mekeme qyzmetkerleri men turǵyndardyń qaýipsizdigin qamtamasyz etýdi tapsyrdy, dep habarlaidy "Ult aqparat".
Jiynda sonymen qatar, tólemderge bailanysty barlyq qujattardy qabyldaý jáne túsindirý jumystary elektrondy túrde júrgizilýi tiis ekeni aityldy. Qala basshysy tiisti mekemelerge kópshilikke úgit-nasihat jumystaryn kúsheitýdi tapsyrdy.
«Karantinge deiin strategiialyq mańyzdy nysandarda jumys isteitin mamandardy jumys berýshi óndiris aýmaǵynda eńbek etýine jaǵdai jasaýy kerektigi sóz boldy. Ol úshin nysan aýmaǵynda arnaiy jataqhana jabdyqtap, qyzmetkerlerdi sol jerlerge ornalastyrýǵa bolady. Bul qurylys pen óndiristiń qajettiligine bailanysty eskerilýi kerek», - dedi qala basshysy.
Degenmen birinshi kezekte kúsheitilgen kúzet pen qaýipsizdikti saqtaý eskeriledi. Sonymen qatar azyq-túlik dúkenderi men bazarlardaǵy saýda qatarlary sanitarlyq norma boiynsha jumys isteýi qajet. Qala basshysy tiisti sala jetekshilerine blok beketterdi kóbeitý týraly tapsyrma berdi. Qaladaǵy «Sergek» beinekamerasy ahýaldyq ortalyqqa qosylyp, jaǵdai sol kameralardyń kómegimen baqylaýǵa alynady. Bekitilgen erejege sáikes, qalaǵa eshkim kirip-shyqpaýy kerek. Óitkeni Shymkenttiń aýmaǵy úlken, halyq sany millionnan asady. Sondyqtan jurt shoǵyrlanǵan jerde qater joǵary.
Aita keteiik, indetti juqtyrýy múmkin degen qaýpi bar azamattardyń barlyǵy tekserýden ótedi. Qalada zalalsyzdandyrý jumystary kúsheitilip, qalyptasqan jaǵdai turǵyndarǵa ýaqytyly habarlanady.
