Taiaýda Shymkentmunai óńdeý zaýytyndaǵy jańǵyrtý jumystarynyń birinshi kezeńi aiaqtalady dep kútilýde. Elimizdegi munai óńdeitin eń iri úsh zaýyttyń biri sanalatyn óndiriste búginde qurylys jumystary qarqyndy júrgizilip jatyr.
Kásiporyn mundai múmkindikke elimizdegi Údemeli indýstrialdy innovatsiialyq damý baǵdarlamasynyń aiasynda qol jetkizip otyr. Jańǵyrtý jumystarynyń negizinde zaýyt jylyna 4 myń tonna kúkirt shyǵarýǵa qaýqarly bolady. Munai ónimderin sańlaýsyz quiý kesheniniń de qurylysy aiaqtalǵan. Nátijesinde zaýyttaǵy janarmai men dizel otynynyń sapasy Eýro-4 jáne Eýro-5 standartyna sáikestendirilmek.
Al, jańǵyrtý jumystarynyń ekinshi kezeńinde zaýyttyń ónim shyǵarý kólemin jylyna 6 mln. tonnaǵa deiin jetkizý jáne munai óńdeý tereńdigin 80 paiyzǵa deiin kóbeitý kózdelip otyr. Joba tolyq júzege asqan kezde elimizdegi munai óńdeý zaýyty álemdik talaptarǵa tolyq jaýap beretin joǵary tehnologiialy iri óndiris ornyna ainalatyn bolady.
Strategiialyq mańyzy bar jobany «Qazaqstannyń Damý Banki» qarjylandyryp otyr. Iaǵni bank pen zaýyt arasyndaǵy kelisimge sai qaita jóndeý jobasyn qarjylandyrý úshin nesie jelisi ashylǵan bolatyn.
13 jylǵa deiingi merzimge berilgen nesieniń jalpy somasy 932 mln AQSh dollaryn quraidy. Jalpy quny 1,9 mlrd AQSh dollary bolatyn joba indýstriialyq-innovatsiialyq damýdyń 2015-2019 jyldarǵa arnalǵan memlekettik baǵdarlamasy aiasynda qarjylandyrylýda.
Shymkent munai óńdeý zaýytyn jańǵyrtý jáne qaita jóndeý eki kezeńmen júzege asyrylýda. Birinshi kezeńde Keden odaǵy elderinde qabyldanǵan K4 jáne K5 (Eýro-4 jáne Eýro-5 balamasy) ekologiialyq klasty benzin men dizel otynyn shyǵarýdy retteý josparlanǵan, ekinshi kezeńde munai óńdeý tereńdigin, sondai-aq qýatyn jylyna 5,250 mln tonnadan 6 mln tonnaǵa deiin ulǵaitý josparlanǵan.
