Ońtústik Qazaqstan oblysynyń ákimi Janseiit Túimebaev elimizdegi belgili qurylys kompaniiasy – BI Group Construction JShS-i basqarma tóraǵasynyń orynbasary Nurdáýlet Ákimjanovpen kezdesti, dep habarlaidy "Ult aqparat" aimaq basshysynyń baspasóz qyzmetine silteme jasap.
Basqosýda taraptar qazaqstandyq jáne TMD naryǵynda 20 jyldan astam ýaqyttan beri túrli salalarda qurylys jumystaryn júrgizip kele jatqan atalǵan kompaniianyń Ońtústikke tigizer úlesin talqylap, kúngeide boi kóterýi tiis áleýmettik nysandar men záýlim ǵimarattar jaiyn talqylady.
Jiynda BI Group Construction-nyń biznesti damytý boiynsha basqarýshy direktory Aian Zikirin kompaniianyń tarihy men aldaǵy múmkindikteri jóninde arnaiy tanystyrylym jasap, Ońtústik úshin oilastyrylǵan jobalardy usyndy.
Óz kezeginde, oblys ákimi kompaniia jetekshiligin Shymkentte boi kóterip jatqan mańyzdy nysandar – «Shymkent City» jobasyna, áleýmettik nysandar – mektep, balabaqshalar men aýrýhanalardy, atap aitqanda, onkologiialyq ortalyq pen týberkýlez dispanserin, sonymen birge, sport keshenderin salý jumystaryna qatysýǵa shaqyrdy.
Jiyn qorytyndysy boiynsha taraptar aldaǵy ýaqytta usynylǵan jobalar aiasynda naqty kelisimder jasasyp, ýaǵdaslastyq ornatýǵa bekidi.
Aita ketý qajet, Qazaqstanda nómiri 1-shi, álem naryǵynda 185-oryndaǵy qurylys kompaniiasy bolyp tabylatyn seriktestik qurylys salasynda sońǵy 22 jyldan beri túrli aýqymdy jobalardy júzege asyryp keledi. Elimizdegi segiz oblys pen Resei jáne Grýziiada belsendi jumys istep kele jatqan kompaniianyń ótken jylǵy ainalym qarajaty 920 mln. AQSh dollary bolyp, 1200 shaqyrym avtojol men 3 mln. sharshy metr turǵyn úi jáne kommertsiialyq nysandardy salýǵa muryndyq bolǵan. Naqtyraq aitqanda, BI Group Construction kompaniiasy respýblikadaǵy mańyzdy nysandar – «Astana EKSPO-2017» halyqaralyq kórmesiniń nysandaryn, Nazarbaev ziiatkerlik mektepteriniń boi kóterýine qatysqan alpaýyt uiym.
