Parlament Májilisiniń depýtaty Amanjan Jamalov Shymkenttegi áýejaidyń tenderge túsý zańdylyǵyn tekserýdi talap etti, dep habarlaidy "Ult aqparat".
«Jańa ekonomikalyq baǵyttyń bazalyq qaǵidattarynyń biri – Memleket basshysy atap ótkendei ádil básekelestik. Prezident aitqandai, «kásipkerler ádette naryqqa kire almaidy, eger ense, olar jeke monopolisterge baǵynýǵa májbúr». Kóbinese básekelestikke qarsy tarap retinde strategiialyq nysandardy jeke qolǵa beretin memlekettik organdardyń ózi kórinip qalyp jatady. Áýejailardaǵy qyzmet kórsetý naryǵy da bul máseleden ainalyp ótken joq», - deidi Amanjan Jamalov Úkimet basshysyna joldaǵan saýalynda.
Onyń aitýynsha, qazirgi ýaqytta Shymkent qalasynyń jolaýshylar kóligi jáne avtomobil joldary basqarmasy «Shymkent áýejaiy» AQ-ty satyp alý quqyǵymen senimgerlik basqarýǵa berý úshin tender jariialaǵan. Senimgerlik basqarý merzimi - 10 jyl. Al tenderge ótinimder tek 3 aptanyń ishinde - 2020 jyldyń 18 qyrkúiegi men 8 qazany aralyǵynda qabyldanady.
«Mundai qaýyrt merzim kóptegen strategiialyq investorlardy básekeden ysyryp tur. Máselen, Air Astana áýe kompaniiasy qysqa merzimge qanaǵattanbaitynyn jariialady. Bireý úshin bul tenderdi shuǵyl ári tynysh ótkizý tiimdi me dep qalasyń. Tań qalatyn taǵy bir jáit, konkýrsqa tipti jeke adamdar men jeke kásipkerler de qatysa alady eken. Bir adam tutas áýejaidy qalai basqara alady? Bul qala áýejaiynyń bolashaǵyna kúmán keltiredi. Sonymen qatar, sarapshylardyń pikirinshe, mundai nysan úshin bastapqy baǵa retinde belgilengen 5,2 mlrd teńge - tómendetilgen qun», - deidi ol.
Osy máselelerdi aita kele depýtat tenderge ótinimdi qabyldaý merzimin uzartýdy, áleýetti qatysýshylarǵa qoiylatyn talaptardyń qaita qaralýyn, nysannyń baǵasyn qaita baǵalaýdy talap etti.
