"Tóleitin bolsa, tort úshin qýana-qýana 10 million eýro alar edim", — dedi Shymkenttegi atyshýly torttyń avtory Renat Agzamov keshe keshkisin Instagram jelisindegi tikelei efirde. Bul týraly sputniknews.kz agenttigi jazady.
"Bul torttyń Qazaqstandy biraz shýlatqanyn bilemin. Torttyń qunyna qatysty neshe túrli qyzyq pikirlerdi oqydym, tilshiler de "otqa mai quiyp" jatyr-aq. Bir tańǵalatynym, jýrnalister nege birden torttyń quny 3 million eýro, 5 million dollar, 10 million dollar dep aita salmaidy eken? Nege basqadai somalardy jazady? Halyqty eleń etkizetin somany kórsetkisi keletin shyǵar. Odan da birden qomaqty qarajatty jazbaisyzdar ma? Nege sonsha tómendetesizder?! Interentte 178 myń dollar dep jazypty, bireýler 180 myń eýro, 250 myń dollar, 380 myń eýro deidi! Ainalaiyndar, qunyna kelgende nege aryq sóilep qaldyńyzdar? Ondaǵan million dollar, ondaǵan million eýro deńizder. Sonda jurt odan beter shýlaspai ma? Bul tort nege sonsha qymbat dep tańdai qaǵatyn bolady!", — deidi Agzamov oqyrmandarynyń suraǵyna jaýap berip.
Biraq ol jurtty tamsandyrǵan týyndysynyń shynaiy baǵasy týraly tis jarǵan joq.
"Shyn baǵasyn eki-aq adamnyń bilýge haqy bar – tapsyrys berýshi jáne men. Biraq tilshiler menen qaraǵanda kóbirek biletin siiaqty. Jurtty shýlatqylaryńyz kelse, baǵasyn asyryp aityńyzdar! Meniń eńbegimdi tómendetpei, qomaqty somany jazyńyzdar. Torttyń shynaiy baǵasyn tapsyrys berýshi ekeýimiz ǵana bilemiz. Sol jetkilikti. Tóleitin bolsa, tort úshin 10 ese kóp aqsha alar edim. 10 million eýro tólese, qýana-qýana alar edim. Nege almasqa? Máselen, 50 million eýro. Keremet emes pe?!", — deidi Agzamov.
Eske sala keteiik, qaznet qoldanýshylaryn tań qaldyrǵan sarai túrindegi tortty reseilik sheberler komandasy daiyndaǵan. Bul jóninde áleýmettik jelide konditerlik óner boiynsha Resei chempiony Renat Agzamov jazǵan. Shymkenttik toiǵa arnalǵan torttyń diametri – úsh metr, biiktigi – 4,2 metr. Áleýmettik jeli qoldanýshylarynyń paiymdaýynsha, bul táttiniń boljamdyq quny shamamen 180 myń dollar.
