Shymkent politsiia departamenti keshe qalada bolǵan atystyń egjei-tegjeiin aitty, - dep habarlaidy Massaget.kz.
"20 aqpanda saǵat 14:40-ta Shymkent politsiia departamenti Turan aýdandyq politsiia basqarmasyna Rysqulbekov kóshesinde ornalasqan qarý-jaraq dúkenine qaraqshylyq shabýyl jasalǵany týraly habarlama tústi. Oqiǵa ornyna kelgen jedel-tergeý toby 1973 jyly týǵan Ózbekstan Respýblikasynyń azamaty ańshylyq myltyq satyp alýshy keipinde dúkenge kirgenin anyqtady. Ári qarai satýshyny óziniń qarýymen qorqytyp, oǵan "Saiga" markaly myltyqty birneshe patronymen qosa berýge májbúr etti. Er azamat "dabyl qońyraýy" arqyly kelgen kúzet agenttigi qyzmetkerleriniń ekipajyn baiqap, olarǵa óz qarýymen oq atqannan keiin, eki jaq taraptan atys bastaldy. Saldarynan kúzet agenttiginiń qyzmetkeri qolynan jaraqat alyp, ekinshi kúzetshige oq bronejiletine tigen", - delingen habarlamada.
Kúdiktini politsiia qyzmetkerleri birden ustaǵan.
Shymkent politsiia departamentiniń baspasóz qyzmeti bul is sotqa deiingi tergep-tekserýdiń biryńǵai tizilimine QR Qylmystyq kodeksiniń 192-baptyń 2-bólimi "Qaraqshylyq", 24-baptyń 3-bólimi, 99-baptyń 2-bólimi "Adam óltirýge oqtalý" jáne 287-baptyń 3-bólimi "Atys qarýyn zańsyz iemdený, berý, ótkizý, saqtaý, tasymaldaý nemese alyp júrý" boiynsha tirkelgenin habarlady.
Kúdikti ýaqytsha ustaý izoliatoryna qamaldy. Qazirgi tańda tergeý áreketteri júrgizilip jatyr.
