Túrkistan oblysy men Shymkent qalasy arasynda nysandardy bólý balansy jasalyp, 99 nysan shym qalanyń kommýnaldyq menshigine ótti. Bul másele búgin qalalyq máslihattyń kezekten tys 41-sessiiasynda qaraldy.
Sessiia barysynda qalanyń 2018-2020 jyldarǵa arnalǵan biýdjetine tolyqtyrýlar men ózgerister engizilip, 2018-2020 jyldarǵa arnalǵan damý baǵdarlamasy bekitildi. Bul máseleler depýtattar tarapynan biraýyzdan qoldaý tapty. Máslihatta qala ákimi Ǵabidolla Ábdirahymov ózine júktelgen fýnktsiialar men mindetterdiń oryndalýy týraly esep berdi. Qala statýsynyń ózgerýine bailanysty negizgi kúsh ákimshilik-uiymdastyrý jumystaryna baǵyttalǵanyn aitqan qala basshysy jergilikti atqarýshy organdardyń turaqty jumys isteýin qamtamasyz etý úshin qysqa merzimde kóptegen is-sharalar atqarylǵanyn jetkizdi. Máselen, qalalyq ákimdiktiń basqarý qurylymyna ózgerister engizilip, qyzmetkerlerdiń sany 509-dan 721-ge jetken. Al, ákimdiktiń 15 salalyq bólimderi qaita qurylymdalyp, basqarma bolyp ózgertilgen. Taǵy jańadan 8 basqarma qurylǵan.
Shymkentte atqarylǵan jumystardyń 10 ailyq kórsetkishterine toqtalǵan shahar basshysy ónerkásip óniminiń kólemi 384 mlrd teńgeni qurap, ótken jylmen salystyrǵanda 4 paiyzǵa artqanyn atap ótti. Osy kezeń aralyǵynda indýstrialdy-innovatsiialyq damý baǵdarlamasy boiynsha 9,5 mlrd teńgeni quraityn 8 joba iske qosylyp, jańa 613 jumys orny ashylǵan.
«Osydan eki jyl buryn qabyldanǵan damý tujyyrymdamasy boiynsha Shymkentti million turǵyny bar qalaǵa jetkizý maqsaty qoiylǵan edi. Biz oǵan qol jetkizdik. Taiaýda Ońtústik Koreiaǵa baryp qaittym. Onda Seýl qalasynyń basshylyǵymen kezdesip, qurylys kompaniiasynyń basshylarymen birqatar kelisimderge qol jetkizdik. Endi kelesi jyly qalada úlken qurylys jumystary bastalady», - dedi Ǵabidolla Ábdirahymov.
