Shymkent qalasynda QR Táýelsizdiginiń 30 jyldyǵy qarsańynda qazaq teatrynyń tuńǵysh rejisseri Jumat Shaninge arnalǵan eskertkish ashyldy, dep habarlaidy QazAqparat.
Eńseli eskertkishtiń ashylaýyna qala ákimi Murat Áitenov, qalalyq máslihat depýtattary men J.Shaninniń urpaqtary jáne ziialy qaýym ókilderi qatysty.
Ulttyń uly tulǵalaryna qurmet kórsetý perzenttik paryz ekenin alǵa tartqan M.Áitenov jiylǵan qaýymdy Táýelsizdik merekesimen quttyqtady.
«Shymkent teatry Jumat Shanin esimin 1972 jyly ielendi. Araǵa 50 jyldaý ýaqyt salyp, teatr aldyna qairatkerdiń eńseli eskertkishi tuǵyrǵa qondy. Qazaq teatr óneriniń ustazy bolǵan tulǵanyń ǵibratty ǵumyry men mol murasy – halqymyzdyń asyl qazynasy. Jumat Shaninge qurmet kórsetý arqyly biz mádeniet qairatkerlerine qurmet kórsetemiz. Ult tarihyndaǵy alǵashqy kásibi teatr mamanynyń ómirlik tanymy – óskeleń urpaqtyń boi túzer baǵyty bolatynyna senimdimin», - dedi qala ákimi.
Jumat Shanin atyndaǵy akademiialyq qazaq drama teatrynyń aldyna ornatylǵan eskertkishtiń biiktigi tuǵyrymen qosqanda 5 metrge jýyqtaidy.
Avtory – mádeniet qairatkeri, Sýretshiler odaǵynyń múshesi Ábdýahat Muratbaev. Biyl tuńǵysh qazaq teatr óneriniń negizin qalaǵan, ony kásibi deńgeide qalyptastyrǵan Jumat Shaninniń týǵanyna biyl 129 jyl toldy.
