Shymkentte júk kóligi 3 avtokóliktiń ústine aýdaryldy, dep habarlaidy QazAqparat.
Jol-kólik oqiǵasy Rashidov kóshesiniń boiynda boldy. «Gaz-53» markaly júk kóliginiń júrgizýshisi rýlge ie bola almai qalyp, mashinanyń aýdarylýyna jol bergen. Saldarynan kólik jýý ortalyǵynda turǵan 3 jeńil avtokólik janshylyp qaldy.
Oqiǵa kýágeriniń málimetinshe, «Gaz-53» markaly mashinanyń tejegishi isten shyqqan. Video avtorynyń sózinshe, úsh kóliktiń ekeýine qatty zaqym kelgen.
Politsiia qaza bolǵandar men zardap shekkender joq ekenin málim etti. «Janshylǵan jeńil kólikter jeke azamattarǵa tiesili. Olardyń shyǵynyn óteý jaǵyn sot sheshedi»,- dedi Politsiia departamentiniń baspasóz qyzmetinen.
«Patrýldik politsiia polkiniń qyzmetkerleri júk kóliginiń júrgizýshisine qatysty QR Ákimshilik quqyq buzýshylyq týraly kodekstiń 610-babymen («Kólik quraldary júrgizýshileriniń jol júrisi qaǵidalaryn adamdardyń densaýlyǵyna ziian keltirýge, kólik quraldarynyń nemese ózge de múliktiń búlinýine alyp kelgen buzýshylyǵy») ákimshilik hattama toltyryldy. Jinaqtalǵan is-qujattar ákimshilik sotqa joldanady», - delingen politsiia habarlamasynda.
