Foto: videodan skrinshot
20 qańtarda Shymkent qalasynda Erimbetov pen Rysqulov kósheleriniń qiylysynda jol-kólik oqiǵasy bolyp, arty jappai tóbeleske ulasqan. Nátijesinde bir adam qaza tapty, dep habarlaidy Ult.kz Rolites.news saityna silteme jasap.
Aldyn ala málimetterge sáikes, Toyota Camry avtokóligi baǵdarshamnyń qyzyl belgisinde turǵan Hyundai Sonata kóligimen soqtyǵysqan. Hyundai avtokóligin 34 jastaǵy shymkenttik turǵyn Nurmahan Eshanqulov basqarǵan.
Soqtyǵysýdan keiin Toyota Camry kóliginen úsh belgisiz adam, al Hyundai-dan júrgizýshi men eki jolaýshy shyqqan. Oqiǵaǵa qatysýshylar arasynda aýyzsha janjal týyndap, kóp uzamai oǵan Lexus LX 570 avtokóligimen kelgen taǵy tórt belgisiz adam aralasqan. Anyqtalǵandai, olar Toyota Camry-degi adamdarǵa kómekke kelgen.
Nátijesinde taraptar arasynda tóbeles bolǵan. Tóbeles barysynda Kóshkenbaev Maqsattyń moiyn tusynan ótkir-keskish zatpen jaraqat salynǵan. Ol qalalyq №1 klinikalyq aýrýhanaǵa jatqyzyldy. Sondai-aq Nurmahan Eshankýlov pen Vasilii Kolesnikov dene jaraqatyn alǵan.
Oqiǵadan keiin belgisiz tulǵalar Vasilii Kolesnikovty kúsh qoldaný arqyly Toyota Camry avtokóligine otyrǵyzyp, oqiǵa ornynan boi tasalaǵan.
Keiin politsiia qyzmetkerleri Jedel basqarý ortalyǵy inspektorlarynyń qatysýymen Toyota Camry jáne Lexus LX 570 avtokólikterin tiisinshe Báiterekov pen Nazarbekov kóshelerinen tapty. Sondai-aq qaskóiler Kolesnikovty VAZ 2114 avtokóligine aýystyryp, Túrkistan oblysy Ordabasy aýdany baǵytynda ketkeni anyqtaldy. Baǵdarlaý jariialanyp, «Ustaý» jospary engizilgenimen, avtokólikti toqtatý múmkin bolmady.
Sol kúni saǵat 18:33-te Ordabasy aýdany Temirlanovka aýylynda ortalyq aýdandyq aýrýhana mańynan Vasilii Kolesnikovtyń denesi dene jaraqattarymen tabyldy.
Qazirgi ýaqytta quqyq qorǵaý organdary kúdiktilerdi anyqtaý jáne ustaý, sondai-aq VAZ 2114 avtokóligin izdestirý boiynsha sharalar qabyldap jatyr. Oqiǵanyń barlyq mán-jaiy anyqtalýda.
