Shymkentte jeke turǵyn úilerdiń birinde artilleriialyq snariad jarylyp, saldarynan eki adam zardap shekti. Jansaqtaý bólimine túsken olarǵa dárigerler shuǵyl ota jasady, dep habarlaidy "Ult aqparat".
Oqiǵaǵa qatysty naqty derekterdi QR IIM Ishki jáne syrtqy kommýnikatsiialar departamentiniń direktory Almas Sadýbaev aitty.
«11 aqpan kúni Shymkent qalasynyń eki turǵyny eski úlgidegi artilleriialyq snariadtyń jarylýy saldarynan túrli deńgeidegi dene jaraqatyn aldy. Jarylys eki turǵynnyń biriniń snariadty aramen kesýinen oryn alǵan. Olar ony metall qabyldaý ornyna ótkizbek bolǵan, - dedi ol.
Departament basshysynyń aitýynsha, Shymkent qalalyq politsiia jáne tótenshe jaǵdailar departamentteri, sonymen qatar ózge de memlekettik organdardyń mamandary men qyzmetkerlerinen jasaqtalǵan jedel tergeý toby jarylys ornyn qaraý barysynda dál sondai artilleriialyq snariadtardy tapqan.
«Zardap shegýshilerdiń týystarynyń aitýynsha, oq-dáriler tún ishinde Arys qalasynan metall retinde ótkizý úshin ákelingen. Qazirgi ýaqytta oq-dárilerdiń qaidan alynǵanyn anyqtaý sharalary júrgizilip jatyr. QR Qylmystyq kodeksiniń 287-babynda qarastyrylǵan qylmys belgileri boiynsha sotqa deiingi tergeý amaldary júrgizilýde», - dedi Almas Sadýbaev.
Jarylys qaladaǵy Eńbekshi aýdany Zabadam shaǵyn aýdanyndaǵy jeke turǵyn úilerdiń birinde bolǵan. Osy aýdannyń turǵyndary tańǵy saǵat on jarym kezinde qatty jarylystyń únin estidi.
"Qatty qorqyp kettik. Úidiń jan-jaǵyn jarty saǵattyń ishinde politsiia qorshaýǵa aldy", - deidi Salima Óskenbaeva esimdi turǵyn.
Tańǵy saǵat on birden bastap oqiǵa ornynda politseiler, tótenshe jaǵdailar departamentiniń qyzmetkerleri men áskeriler jumys istegen.
Jarylys bolǵan úide jas otbasy úsh balasymen birge turady. Tańerteń áieli jumysqa ketken, al eki bala balabaqshada, bireýi mektepte bolǵan. Otaǵasy úide jalǵyz qalǵan eken. Jarylys kezinde zardap shekken ekinshi adamnyń kim ekeni ázirge belgisiz.
