Ońtústik Qazaqstan oblysynda azamattyq qorǵanys salasynda basshy quramdy daiyndaý josparyna sáikes keshendi oqý-jattyǵý jumystary bastaldy. Oqý-jattyǵý barysynda Shymkent qalasynda jalpy qalalyq seismo-jattyǵý, praktikalyq túrde shatyrly qalashyqty jaiý is-sharasy ótkizildi, dep habarlaidy "Ult aqparat" ákimdiktiń baspasóz qyzmetine silteme jasap.
Búgin oblysta bastalǵan oqý-jattyǵýdyń aiasynda oblys ákimdiginde Ońtústik Qazaqstan oblysynyń ákimi Janseiit Túimebaevtyń tóraǵalyǵymen arnaiy jiyn ótti. Májiliske Qazaqstan Respýblikasynyń ortalyq atqarýshy organdarynyń, Ulttyq ulan Bas qolbasshylyǵynyń ókilderi men jedel top músheleri qatysty.
Jiynda tiisti sala jetekshilerine shtabtyq mashyqtanýdy júrgizý kezinde atqarylatyn jumystar boiynsha mindetter belgilenip berildi.
Tótenshe jaǵdai oryn alǵanda zardap shekken jáne baspanasyz qalǵan halyqty qabyldaý úshin jasalǵan shatyrly qalashyqtyń daiyndyǵymen oblys ákimi J.Túimebaev arnaiy baryp tanysty.
Qalashyqtyń jumysymen tanysý barysynda ákim Shymkent qalasy 7 balldyq kúshi bar jer silkinisi bolýy múmkin joǵary seismikalyq belsendi aimaqta ornalasqanyn aityp, shatyrly qalashyq turǵyndardyń qaýipsizdigi úshin asa qajet ekenin jetkizdi.
Shatyrly qalashyqtyń qurylymyna qala ákimshiligi, qabyldaý pýnkti, tirkeý orny, aqparat pen bailanys pýnkti jáne poshta-telegraf kiredi. Bul qalashyqtyń ákimdigi jergilikti atqarýshy organdardyń laýazymdy tulǵalarynan quralatyn bolady. Shatyrly qalashyqta turǵyndar sýyq mezgilde turǵyn orynmen, taǵammen, sýmen, jyly kiimmen qamtamasyz etiledi. Sonymen qosa, meditsinalyq, qoǵamdyq tártipti qorǵaý, órtke qarsy kólik quraldarymen qamtamasyz etiledi.
Jalpy, shatyrly qalashyqta 100 myńnan astam adamdy ýaqytsha ornalastyrýǵa bolady.
Aita keteiik, 7 ballǵa deiingi jer silkinisi kezinde shyǵyndardyń múmkin sany 11% quraidy.
