Foto: Tengrinews.kz
Shymkentte tapa-tal túste qarý-jaraq dúkenine shabýyl jasaǵan ózbekstandyq azamat sottaldy. Úkim qylmystyq ister jónindegi mamandandyrylǵan aýdanaralyq sotynda oqyldy, dep habarlaidy Otyrar.kz.
Portal málimetinshe, 49 jastaǵy er adamǵa Qylmystyq kodekstiń qaraqshylyq, adam óltirýge oqtalý jáne qarýdy zańsyz saqtaý baptary boiynsha aiyp taǵyldy. Sottalýshy sot otyrysynda óz kinásin moiyndady. Qarý-jaraq dúkenine qarý alý úshin shabýyldaǵanyn, keiin bank tonamaq bolǵanyn aitty.
Sot oǵan 15 jyl merzimge bas bostandyǵynan aiyrý jazasyn taǵaiyndaǵan. Sottalýshy jazasyn qylmystyq-atqarý júiesiniń qaýipsizdigi ortasha túzeý mekemesinde óteitin bolady. Úkim zańdy kúshine engen joq.
Eske salsaq, biyl 20 aqpanda Iliiaev pen Rysqulbekov kósheleriniń qiylysynda ornalasqan qarý-jaraq dúkenine shabýyl jasaldy. Bul sátte dúken satýshysy «dabyl» túimesin basyp úlgergen. Oqiǵa ornyna kúzet agenttiginiń qyzmetkerleri jetip, dúkenge shabýyldaǵan qarýly adam arasynda atys boldy. Politseiler kósheniń qaq ortasynda qarýmen júrgen sheteldikti sol kúni ustady. Ony ustaý sátiniń videosy áleýmettik jelilerde tarady.
