Bizdiń elimizde múmkindigi shekteýli jandarǵa múmkindiginshe jaǵdailar jasalyp jatyr. Qazir barlyq qoǵamdyq oryndarda ǵimaratqa qolarbamen erkin kire alatyndai pandýstar ornatylǵan. «Invotaksiler» jumysy jolǵa qoiylyp keledi.
Endi osyndai jaqsylyqtardyń qatarynda zaǵip jandar úshin «sóileitin baǵdarshamdar» qyzmet kórsetpek.
Shymkent qalalyq jolaýshylar kóligi jáne avtomobil joldary bólimniń basshysy Q.Jumataev jańa baǵdarshamdardyń janǵan túsi men kóshe atyn qazaq jáne orys tilderinde habarlap turatyndyǵyn aitady. Buryn ortalyqtaǵy keibir baǵdarshamdar dyńyldap dybystyq belgi berip turatyn. Biraq, bul zaǵip jandardy qaýipten qutqarýǵa kómektese almaityn edi.
Jyl sońyna deiin Shymkent qalasyndaǵy 20 kóshe qiylysyna osyndai qurylǵy ornatylady. Qazir onyń 12-si jumys istep tur. Al qalǵandary jeltoqsan aiyna deiin iske qosylady.
Árine, bul ońtústik turǵyndary úshin jańalyq bolǵanymen, órkenietti elder úshin tańsyq dúnie emes. Máselen, Germaniiada avtobýstardyń júrý kestesi aialdamada jazylǵan. Kórsetilgen minýtta kólik aialdamada turady. Al múmkindigi shekteýli azamattar úshin avtobýs esiginen qosymsha tabaldyryq avtomatty túrde túsiriledi. Ishke engen soń saqtandyratyn beldigi bar arnaýly oryn daiyn. Qai ǵimaratqa barsańyz da jaǵdai jasalǵan. «Jaqsyny kórmekke» degendei, álemniń adamzat qajetine orailastyrylǵan jańa tehnologiiasy óńirlerge de dánin osylaisha sebe bastady.
Baqtiiar TAIJAN,
«Egemen Qazaqstan»
Ońtústik Qazaqstan oblysy
.jpeg)