Foto: Shymkent qalasynyń ákimdigi
2017 jyly Ońtústik Qazaqstan oblysy ákimdiginiń qaýlysymen «Ortalyq sý-sport kesheni» MKQK satyp alý quqyǵymen senimgerlik basqarýǵa berilgen bolatyn. Nysannyń naryqtyq quny 1 mlrd 213 mln 700 myń teńgeni qurady. Elektrondy saýda nátijesinde jeńimpaz atanǵan «GRAND TRUST» JShS-men senimgerlik basqarý týraly kelisimshart jasaldy. Kelisimshartqa sáikes, senimgerlik basqarýshy nysanǵa 500 mln teńge investitsiia salyp, salyqtyq mindettemelerin ýaqytyly oryndaýǵa tiis bolǵan.
Alaida, Shymkent qalasy ákiminiń baspasóz qyzmeti taratqan aqparatqa súiensek, kelisimshart talaptary oryndalmaǵan.
- Basqarýshy kompaniianyń mindetterin adal oryndamaýy saldarynan búginde ǵimarat paidalanýǵa jaramsyz kúige tústi. Qabyrǵalary jarylǵan, keibir eden jabyndary opyrylǵan. Aldyn ala tekserý barysynda keshenniń qaýipsizdik talaptaryna sai kelmeitini jáne ony paidalaný azamattardyń ómiri men densaýlyǵyna qaýip tóndiretini anyqtaldy, - delingen ákimdik aqparatynda.
«GRAND TRUST» JShS direktory Sadyqov Aqnur Smailulynyń basshylyǵymen senimgerlik basqarýshy kompaniia jyl saiyn jergilikti biýdjetten qarjylandyrylyp otyrdy. 2018-2024 jyldar aralyǵynda ǵimaratty ustaý jáne sý sporty túrleri boiynsha sportshylardy daiarlaý úshin 1 mlrd 218 mln teńgeden astam qarajat bólingen. Sonymen qatar, 2021-2024 jyldar aralyǵynda memlekettik sporttyq tapsyrysty jan basyna qarjylandyrý aiasynda Ortalyq sý-sport kesheninde jumys istegen «Sý sporty túrleri ortalyǵy» JShS jalpy somasy 335 million teńge kóleminde qarajat alǵan.
- Kompaniianyń biýdjetke salyqtyq mindettemeler boiynsha 111 mln teńgeden astam qaryzy jáne sot sheshimine sáikes shamamen 179 mln teńge qaryzy bar. Osyǵan bailanysty Shymkent qalasy ákimdigi «GRAND TRUST» JShS-men jasalǵan senimgerlik basqarý kelisimshartyn buzý týraly talap aryz berdi. Aryzdy Shymkent qalasynyń mamandandyrylǵan aýdanaralyq soty qanaǵattandyrdy. Aita ketý kerek, tekserýlerdiń qorytyndysy boiynsha barlyq materialdar jaǵdaidy taldaý jáne quqyqtyq baǵalaý úshin tiisti organdarǵa beriledi,-delingen Shymkent ákimdiginiń aqparatynda.
Biyl «Ortalyq sý-sport keshenine» kúrdeli jóndeý júrgizý josparlanyp otyr.
Aita keteiik, budan buryn Shymkentte sapasyz salynǵan 1,4 mln teńgeniń jol jabyny qaita tóselgenin jazǵan bolatynbyz.
