Shymkent qalasyndaǵy kardiologiialyq ortalyqta pnevmoniiaǵa shaldyǵyp, densaýlyǵy kúrt tómendegen naýqastardy ekstrakorporaldi membranaly oksigenatsiialyq (EKMO) apparatyna qosyp emdep jatyr. Mamandar bul qurylǵyny IVL apparatyna qosymsha kómek retinde paidalanýda, dep habarlaidy "Ult aqparat".
Qalalyq kardiologiialyq ortalyq janynan ashylǵan EKMO ortalyǵyna shahardyń ózge aýrýhanalarynan densaýlyǵy nasharlaǵan naýqastar jetkizilýde. Dárigerler naýqastardy osy tásilmen emdeýde.
«EKMO apparaty – ókpe qabynyp jumysy qatty nasharlaǵan kezde qandy ottegimen qamtamasyz etedi. Iaǵni, adamnyń kúre tamyrlarynan arnaiy tútiksheler arqyly apparatqa qosyp, EKMO-ǵa quiylǵan qanǵa qajetti deńgeide ottegi beriledi. Sosyn qaita adam aǵzasyna jiberiledi. Osynyń arqasynda qan ainalymy jaqsarady. Atalǵan qurylǵy naýqasqa der kezinde kómek kórsetýge múmkindik beredi», - deidi Shymkent qalalyq kardiologiialyq ortalyqtyń direktory Ermaǵanbet Qýatbaev.
Kúni búginge deiin bul apparatqa 5 naýqas qosylyp, onyń biriniń densaýlyǵy jaqsarǵan. Mamandar aldaǵy aptada saýyqqan naýqastardy úilerine qaitarýdy josparlap otyr. Pnevmoniianyń el arasynda keńinen taralýyna orai EKMO ortalyǵynda 35 tósek-oryn daiyndalǵan. Shymkenttik kardiologtar ózge oblystardaǵy áriptesteriniń de EKMO apparatyn osy bir indetke qarsy kúreste qoldanýyn keńes beredi. Biraq EKMO-ny adam aǵzasyna qosý úshin kardiohirýrg, anesteziolog-reanimatolog, perfýziolog syndy mamandar komandasy qajet. Dese de, jumystyń 80 paiyz aýyrtpashylyǵy medbikelerdiń moinynda bolatyn kórinedi.
Aita keteiik, júieli jumystyń arqasynda kúni búginge deiin qalalyq kardiologiialyq ortalyqtyń birde-bir qyzmetkeri jaman indetti juqtyrmaǵan.
