Shymkentte páter ishinen úsh adamnyń óli denesi tabyldy, dep habarlaidy QazAqparat.
Keshe keshkisin saǵat 17:36 shamasynda «103» qyzmetine habarlasqan turǵyn Ál-Farabi aýdany, Ermanov kóshesi boiyndaǵy kóppáterli úige shaqyrtý jasap, esikti ashý kerektigin aitqan.
Oqiǵa ornyna jetken jedel qutqarý jasaǵy arnaiy quraldardyń kómegimen kire beris esikterdi ashty. Páterdiń ishinen 1978, 1957, 1979 jyly týǵan úsh adamnyń denesi tabyldy. Qazirgi kezde olardyń qaitys bolý sebepteri anyqtalýda.
«Sot meditsinalyq saraptama taǵaiyndaldy. Oqiǵa ornyna Tótenshe jaǵdai departamentiniń 8 qyzmetkeri men 2 dana tehnikasy jumyldyryldy. Qazir politsiia qyzmetkerleri tergeý jumystaryn júrgizip jatyr» delingen Shymkent qalasy Tótenshe jaǵdai departamentiniń qoǵammen bailanys toby taratqan málimette.
