Shymkenttiń Halyqty jumyspen qamtý ortalyǵy «Ortalyq» saiabaqta bos jumys oryndarynyń kezekti jármeńkesin uiymdastyrdy. Eńbek jármeńkesine qaladaǵy 256 kásiporyn qatysyp, 1666 bos jumys oryndaryn usyndy, dep habarlaidy Ult.kz tilshisi QazAqparat agenttigine silteme jasap.
Atap aitqanda, bilim salasy - 220, densaýlyq saqtaý salasy - 92, ónerkásip - 202, qurylys - 62, transport jáne logistika - 21, mádeniet jáne sport - 55, qyzmet kórsetý salasy boiynsha 1014 bos jumys orny usynyldy. Sonymen qatar, 20 iri kásiporyn óndiriske qajetti mamandar izdedi.
Jalpy, jármeńkege qatysýshylardyń qarasy kóp boldy. Onda qoldaryna endi diplom alǵan jastar ǵana emes, eresekterdi de baiqaýǵa bolady. Densaýlyq saqtaý, bilim, óndiris salasyna jumys usynǵan mekemeler aldynda jumys izdeýshiler uzyn-sonar kezekte turdy.
Óz kezeginde sala mamandary jumys isteýge nieti bar jandar úshin Shymkentte jumys kóp dep otyr.
«Sáýir aiynda ótkizilgen jármeńkede 2 myńǵa jýyq bos oryn usynylyp, 520 adamǵa joldama berilgen bolatyn. Sońǵy 7 aidaǵy qorytyndy boiynsha túrli mekemeler usynǵan bos jumys oryndaryna 7 myń adam ornalasty. «Nátijeli jumyspen qamtýdy jáne jappai kásipkerlikti damytýdyń 2017-2021 jyldarǵa arnalǵan baǵdarlamasy» aiasynda kásibi oqytýdy damytý jumystary da júzege asýda. Eńbek naryǵyna daiyn bolýy úshin birinshi jartyjyldyqta 32 mamandyq boiynsha 1739 adamdy 3 ailyq kýrsqa oqýǵa joldadyq», - deidi Shymkent qalalyq jumyspen qamtý jáne áleýmettik baǵdarlamalar bóliminiń basshysy Baýyrjan Qýanyshbaev.
