Foto:otyrar.kz
Balanyń qolyna qalam tyǵyp alǵan muǵalim Shymkenttegi mektepte jumysyn jalǵastyrady, - dep habarlaidy Tengrinews.kz tilshisi Otyrar.kz saityna silteme jasap.
Bilim basqarmasy málimetinshe, muǵalim abaisyzda balanyń qolyna úshkir qalamdy tigizip alǵan, sondyqtan №69 mektepte synyp jetekshisi qyzmetin jalǵastyrady.
"Oqiǵa saǵat 14:45-te №69 mekteptiń 5 "J" synybynda úzilis kezinde bolǵan. Muǵalim balalardyń qalai tóbelesip jatqanyn kórip, olardy ajyratýǵa kelgen. Sol kezde qolynda qalam bolǵan, ony abaisyzda Jolbarysqa tigizip alǵan. Synyp jetekshisi jáne zardap shekken balanyń ata-anasymen túsindirme áńgime júrgizildi. Muǵalimge qatysty tártiptik shara qoldanyldy, mektepte jumys jalǵasady", - dedi qala ákimdik ókilderi.
Bul rette zardap shekken balanyń anasy synypta eshqandai janjal bolmaǵan dep sendiredi. Onyń ústine, muǵalim óz áreketin birden moiyndap, soqqynyń kúshin eseptemei qalǵanyn, balalar arasynda kikiljiń týraly áńgime bolmaǵanyn aitty.
"Muǵalimmen hat almastyq, oǵan birden jazdym. "Nege djinsy shalbar úshin bulai istedińiz, muny ózime aitsańyz bolar edi ǵoi?" dedim. Ol: "Ne aityp tursyz, men jai istedim ǵoi". Bulai bolady dep oilamappyn. Keshirińiz, dedi", - deidi anasy Juldyz Aitmahanbetova.
Ol politsiiaǵa aryz jazǵan. Osy kúnderden bastap muǵalimniń týystary úiine kele bastaǵan. Áielden tatýlasýdy surap, bolmasa muǵalim óz-ózine qol jumsaidy dep qorqytqan.
"Bul aqparatty Qaratuz aýdandyq Politsiia basqarmasynyń qyzmetkerleri tirkegenin habarlaimyz. Oqýshyǵa sot-meditsinalyq saraptama taǵaiyndaldy. Qazirgi ýaqytta oqiǵanyń barlyq mán-jaiyn anyqtaýǵa baǵyttalǵan tergeý is-sharalary júrgizilip jatyr", - dedi Shymkent Politsiia departamenti ókilderi.
Keiinirek áiel aryzyn qaitaryp alǵany belgili boldy.
