Shymkenttegi 4 shaǵynaýdannyń júrgizýshileri úshin jol boiyndaǵy keleńsizdikter aiaqtalatyn kún jaqyn. Samal – 1 jáne 2, Qaitpas -1 jáne Soltústik Batys shaǵynaýdandaryndaǵy káriz júiesiniń qurylys jumystary búginde qyza túsken. Bul týraly Shymkent qalalyq ákimdiginde ótken májiliste aityldy. “Nurly jol” memlekettik baǵdarlamasynyń oryndalý barysy qalai? Káriz júiesiniń qurylys-montaj jumystary qashan aiaqtalady?
Qalalyq májiliste qaralǵan úsh máseleniń bireýi – «Nurly jol» infraqurylymdy damytýdyń 2015-2019 jyldarǵa arnalǵan memlekettik baǵdarlamasynyń oryndalý barysy. Shymkent qalalyq turǵyn-úi kommýnaldy sharýashylyq bóliminiń basshysy Nurlan Bektursynov myrza aldymen biyl qurylysy aiaqtalatyn jobalarǵa toqtaldy. Aitýynsha, búginde shahardaǵy 4 joba ulttyq qordan nesieli qaitarma negizinde qarjylandyrylyp, barlyq jumystar kestege sai júrgizilýde. Oryndalǵan meje – 90 paiyz. Jyl sońyna deiin káriz júiesiniń qurylys-montaj jumystary aiaqtalady.
Nurlan Bektursynov, Shymkent qalalyq turǵyn-úi kommýnaldy sharýashylyq bóliminiń basshysy: “4 joba boiynsha 219 kóshede káriz júiesi júrgiziledi. 15 695 abonent káriz jielerne qosylady dep otyrmyz.”
Qurylys jumystarymen qatar qazylǵan transheialardy rettep, kóshelerdi qalpyna keltirý jumystary qosa atqarylýda. Alaida kei kóshelerdi asfaltaý kezinde keleńsizdikter de oryn alýda.
Al asfalt salynǵan kóshelerdegi abonentterdi ortalyq káriz júiesine qosý jumystaryn atqarýda qiyndyq týyndaýda degen sharýashylyq bóliminiń basshysyna qala ákimi jańbyr jaýyp, lai bolmas úshin, jumysty keshiktermeýdi tapsyrdy. Tipti jaqyn kúnderi ózi arnaiy baryp teksermek.
Atalǵan birneshe nysandardyń qurylysy paidalanýǵa tapsyrylsa, qala halqy úshin birshama igi ister atqarylady. Máselen, qala halqynyń káriz júiesimen qamtamasyz etilý deńgeii 42 paiyzdan 49,1 paiyzǵa deiin artady.
Mahabbat Ábdeshova, otyrar.kz
