Shymkent qalasyndaǵy Astana dańǵylyna Nursultan Nazarbaev esimi beriledi. Bul týraly altynshy shaqyrylymdaǵy Shymkent qalasy máslihatynyń kezekten tys 46-sessiiasynda belgili boldy, dep habarlaidy "Ult aqparat".
Sessiiada qala ákimi Ǵabidolla Ábdirahymov Shymkenttegi Astana dańǵylyn Nursultan Nazarbaev esimimen ataýdy usyndy.
«Memleketimizdiń irgetasyn qalaýshysy, elimizdiń Tuńǵysh Prezidenti N.Nazarbaev óziniń saliqaly basshylyǵymen táýelsizdik týyn biikke kóterdi. Ata zańymyzdy, rámizderimizdi, shekaramyzdy jáne rýhani qundylyqtarymyzdy qasterlei otyryp memleketimizdiń abyroiyn asqaqtatý jolynda tarihi bastamalardy júzege asyrdy. Egemendigimizdiń negizin qalaýshy Tuńǵysh Prezidentimiz – barsha qazaqstandyqtar moiyndaǵan jáne halyqaralyq qoǵamdastyq tarapynan qurmetke ie bolǵan uly tulǵa», - dep atap ótti Ǵabidolla Ábdirahymov.
Qala basshysy Elbasynyń esimin osylai ulyqtaý asqan mártebe jáne qýanysh ekenin atap ótti.
«Osyǵan bailanysty Astana dańǵyly ataýyn Nursultan Nazarbaev dańǵylyna ózgertý usynysyn qoldaýlaryńyzdy suraimyn», - dedi ol.
Halyq qalaýlylary qala basshysynyń bul usynysyn biraýyzdan qoldady. Osylaisha, qalanyń ákimshilik-iskerlik ortalyǵy ornalasqan Astana dańǵylyn elimizdiń Tuńǵysh Prezidenti Nursultan Ábishuly Nazarbaevtyń esimimen ataý týraly qujat Respýblikalyq onomastika komissiiasyna jiberildi.
«Bul – Shymkent qalasynyń jańa bóliginiń ortalyq dańǵyly. Bul dańǵyl Dendrosaiabaqqa alyp barady. Dańǵyl boiynda Shymkent qalasynyń ákimshilik-iskerlik ortalyǵy ornalasqan. Muny óte durys sheshim sanaimyn», - dedi Ǵabidolla Ábdirahymov.
Aita keteiik, búgin Qazaqstan prezidenti Qasym-Jomart Toqaev el qalalaryndaǵy ortalyq kóshelerdiń ataýyn Nursultan Nazarbaevtyń qurmetine aýystyrýdy tapsyrǵan edi. Sonymen qatar, ol elorda ataýyn Nursultan dep ózgertýdi usyndy.
