Sýret: Otyrar.kz
Shymkentte qytailyq investor 5 jyldan astam ýaqyt ádildikke jete almai júr. Iýhýa Han alaiaqtyqtyń qurbany bolǵan, dep habarlaidy "Ult aqparat" Otyrar.kz saityna silteme jasap.
Sheteldik azamatqa shymkenttik adam beton zaýytyn salýǵa kómektesemin dep ýáde berip, 530 million teńgeni iemdenip alǵan. Arada birneshe jyl ótse de, investor áli kúnge deiin zaýyttyń iesi bola almai, salǵan aqshasyn da qaitara almady.
Qytailyq investor 5 jyl burn Shymkentte beton zaýytyn salmaqshy bolǵan. Iýhýa Han qytaisha biletin shymkenttikpen tanysyp, zaýyt salýǵa aqsha bergen. Alǵashynda jer satyp alý úshin 120 million teńge suraǵan. Jaqyn arada zaýyt salýǵa aqsha kerek bolatynyn aitty.
"Munyń bári karantinge deiin boldy. Jumysqa kelgenimde meni aldap jatqanyn túsine bastadym. Qytaida biznespen ainalysamyn, beton zaýytym bar. Osydan keiin politsiiaǵa jáne Qytai elshisine habarlastym, olar jaǵdaidyń qalai bolyp jatqanyn habarlap otyr. Dese de áli qiyn. Endi Qazaqstanda zaýytym bar ma, joq pa, bilmeimin. Ara-tura qazir Qazaqstanǵa kelip, istiń qai satyda turǵanyn bilip ketemin", – dedi Qytai azamaty Iýhýa Han.
Sheteldik azamat aqshany qaitarýdy talap ete bastaǵanda, oǵan qurylysty ýaqytynda aiaqtaýǵa úlgermegenderin aityp, Iýhýa Handy Qytai kólikterin Qazaqstanda satýdy bastaýǵa kóndirdi. Nátijesinde Qytai azamaty 530 million teńge quiǵan. Onyń advokaty Samat Saparymbettiń aitýynsha, is boiynsha protsessýaldyq zańbuzýshylyqtar men olqylyqtar kóp.
"2023 jyly tamyzdyń sońynda Eńbekshi aýdandyq ishki ister bólimi bul fakt boiynsha qylmystyq is qozǵady, biraq is sozylyp jatyr. Qytailyq investordy aldaǵan Qazaqstan azamaty tergeý basynda-aq qamaýǵa alyndy. Alaida biraz ýaqyttan keiin ol ketpeý týraly qolhatpen bosatyldy. Qazir kúdikti tergeýge aralasyp, qolhatty buzyp jatyr, oiyna kelgenin isteidi. Onyń kinásin dáleldeitin barlyq dálelder men kýá bar. Biz sondai-aq osy iske qatysty zańbuzýshylyqtar boiynsha bas prokýratýraǵa birneshe shaǵym jiberdik", – dedi Iýhýa Hannyń advokaty Samat Saparymbet.
Bul iske qatysty tergeý bir jyldan astam júrgizilip keledi. Qorǵaýshy tarap kúdiktiniń osy ýaqyt ishinde aqshany qaitarýǵa tyryspaǵanyn alǵa tartady. Shymkent qalalyq IID baspasóz qyzmeti óz kezeginde kúdiktiniń eshqaida ketpeý týraly mindetteme alǵanyna sendiredi.
"Atalǵan azamattyń alaiaqtyq faktisi týraly aryzy negizinde Eńbekshi aýdandyq politsiia bólimi qylmystyq is qozǵady. Qazir tergeý amaldary júrip jatyr", – dep málimdedi Shymkent PD baspasóz hatshysy Baǵlan Isataeva.
Zardap shekken tarap endi Qazaqstanda sot ádil ótedi dep úmitti. Qytai azamaty Iýhýa Han investitsiiasyn qaitara alatynyna senedi.
