Shymkenttegi qonaqúilerdiń birinde qydyryp júrgen arystandy politseiler zoobaqqa ótkizdi. Jyrtqysh ań bir táýlik ishinde erkindikte júrgeni anyqtalǵan, dep habarlaidy "Ult aqparat".
Qalalyq PD baspasóz qyzmetiniń málimetinshe, arystandy izdeýge Jergilikti politsiia qyzmeti basqarmasy men Ál-Farabi aýdany Politsiia basqarmasynyń qyzmetkerleri jumyldyrylǵan. Tártip saqshylary jaqyn mańdaǵy aýmaqtardy aralap, onyń júrýi múmkin barlyq jerlerdi tekserip shyqqan. Turǵyndardan surastyryp, olar da politsiiaǵa jan-jaqty kómek kórsetken. Birlesken is-áreketterdiń nátijesinde arystannyń júrgen jeri anyqtalyp, haiýanattar baǵynyń qyzmetkerlerine tapsyryldy.
Eske salaiyq, buǵan deiin «Instagram» áleýmettik jelisindegi paraqshalardyń birinde azamattardyń qonaq úide arystan kórgeni týraly beinejazba jariialanǵan bolatyn.
«Qazirgi tańda atalǵan jait boiynsha QR Qylmystyq kodeksiniń 339-babymen (Ósimdikterdiń nemese janýarlardyń sirek kezdesetin jáne quryp ketý qaýpi tóngen, sondai-aq paidalanýǵa tyiym salynǵan túrlerimen, olardyń bólikterimen nemese derivattarymen zańsyz ainalysý) sotqa deiingi tergep-tekserý bastaldy. Oqiǵanyń mán-jaiy anyqtalýda» delingen habarlamada.
